Հայաստանի Կառավարությունն իր այսօրվա՝ հուլիսի 18-ի նիստում ընդունել ծառայողական մեքենաների վերաբերյալ որոշումը, որը նախորդ նիստի օրակարգից հանվել էր, քանի որ առարկություններով հանդես էր եկել առողջապահության նախարար Արսեն Թորոսյանը:

Նախորդ նիստին բանավեճ էր տեղի ունեցել Արսեն Թորոսյանի եւ վարչապետի աշխատակազմի ղեկավար Էդւոարդ Աղաջանյանի միջեւ:

Այդ օրինագծով առաջարկվում է 7 ավտոմեքենա կցել առողջապահական տեսչական մարմնին, իսկ մյուս որոշմամբ 73 ավտոմեքենա ամրագրվում է բոլոր տեսչական մարմիններին:

Հատկանշական է, որ նախագիծը կառավարության այսօրվա նիստ մտել է առանց փոփոխությունների: Էդուարդ Աղաջանյանը նշեց, որ լրացուցիչ քննարկում է եղել և իրենք ստացել են Առողջապահության նախարարության կարծիքը: Աղաջանյանը ներկայացրեց ԱՆ-ի դիտարկումները և բացատրություններ տրամադրեց:

«Ես ճիշտ հասկացա, որ Թորոսյանի բարձրացրած հարցերը ստացել են պատասխաններ և կա համաձայնություն»,-հարցրեց վարչապետը՝ ստանալով դրական պատասխան:

Հատկանշական է, որ Արսեն Թորոսյանն այսօրվա նիստին չէր մասնակցում, քանի որ արձակուրդում է:

Հիշեցնենք, որ նախորդ նիստում Արսեն Թորոսյանը հայտարարել էր, որ ճիշտ չէ ամեն մի վարչությանը մեկ ծառայողական մեքենա հատկացնել, ինչը նշանակում է, որ դրանք որպես կանոն վարչության պետերին են հասնում, որոնք չպետք է ունենան մեքենաներ, այլ պետք է լինի հերթապահ մեքենա, որը կօգտագործի ցանկացած աշխատակից:

Վարչապետ Նիկոլ Փաշինյանը պաշտպանել էր Արսեն Թորոսյանի տեսակետը՝ նշելով. «Կարելի է մեքենաներն ամրագրել տեսչությանը, ոչ թե վարչություններին: Ինչու ենք ամրագրում վարչություններին, որ գնում դառնում է վարչության պետի ծառայողական մեքենա: Խոսքը տեսչական մարմնի ներսում գտնվողն վարչությունների մասին է, ինչու ենք նրանց մեքենա կցում»: Հենց այդ հիմքով էլ հարցը հանվել էր օրակարգից:

Այս թեմայի առնչությամբ Facebook-ում գրառում էր արել «Իմ քայլը» խմբակցության պատգամավոր Էդգար Առաքելյանը, ով դեմ էր արտահայտվել «պադավատիզմին»:

• Արսեն Թորոսյանն ու Էդուարդ Աղաջանյանը վիճեցին կառավարության նիստում. Վարչապետը պաշտպանեց նախարարի տեսակետը