Ամուլսարի ոսկու հանքավայրի շահագործումն անթույլատրելի է: Այս մասին NEWS.am-ի թղթակցի հետ զրույցում ասաց Ջերմուկում հանրահավաքի մասնակից, բժիշկ ֆիզիոթերապեւտ Հասմիկ Սարգսյանը:
Բժիշկը հիշեցրեց, որ հանքավայրի շահագործումը ոչ միայն բացասաբար կանդրադառնա, այլեւ կոչնչացնի Հայաստանի հպարտությունը՝ Ջերմուկ հանգստավայրը, որը հայտնի է ավելի քան հարյուր տարի: Հասմիկ Սարգսյանը շեշտեց, որ հանքավայրի շահագործումը հղի է նաեւ Սեւանի աղտոտմամբ, Սևանի թունելի փլուզմամբ `աղտոտված ջրում պարունակվող տարրերի քայքայման հետեւանքով:
Հանքավայրի շահագործումը բնակիչներին շրջակա միջավայրի վատթարացում եւ հիվանդություններ կբերի: Մյուս հնարավոր աղետալի վիճակը՝ ցիանիդ պարունակող տարաների վնասումն է, որոնք օգտագործվում են ոսկու հանքավայրի հարստացման ժամանակ:
Ջերմուկի բնակիչները հանրահավաքին միաձայն «Ոչ» են ասում Ամուլսարի շահագործման ծրագրին: Ընթերցվեց նաեւ հանքավայրի արգելափակման ակցիայի մասնակիցների հայտարարությունը, որն ուղղված է վարչապետ Նիկոլ Փաշինյանին՝ ծրագիրը դադարեցնելու պահանջով: