Ամուլսարի պաշտպանության համար Երեւանում ընթացող ակցիայի մասնակիցները սեպտեմբերի 20-ը հռչակեցին բնապահպանական մոբիլիզացիայի եւ արդարության օր։ Հիշեցնենք, որ հենց սեպտեմբերի 20-ին են Ջերմուկի բնակիչները եւ Ամուլսարի պաշտպանները նշանակել երկրի կառավարության համար այն վերջնաժամկետը, երբ որոշում պետք է կայացվի Ամուլսարի մասին։
Ակտիվիստ Աննա Շահբազյանը կառավարության լուսամուտների տակ տեղի ունեցած ինքնաբուխ միտինգի ժամանակ հայտարարեց, որ կառավարությունն անգործության է մատնված, իսկ հանքավայրի շահագործումն արգելելու իրավական հիմքերի բացակայության մասին հայտարարությունները քննադատության չեն դիմանում։
Ցույցի մասնակիցները իշխանություններին կոչ արեցին հարցը չձգձգել եւ չհովանավորել մասնավոր ընկերությանը։ Ակտիվիստի խոսքերով, բնապահպանության նախարարության եզրակացությունը ինքնըստինքյան հիմնավորում է դրա համար։ «Մենք Երեւանում սատարում ենք ջերմուկցիներին։ Վստահ ենք, որ բոլոր մարզերում բնակիչները սատարում են, եւ Ամուլսարը սար կմնա»,- նշեց նա։
Ցույցի մասնակիցները սեպտեմբերի 20-ը հռչակեցին բնապահպանական մոբիլիզացիայի օր եւ բոլոր քաղաքացիներին կոչ արեցին պատրաստվել զանազան ակցիաների, ինքնակազմակերպվել եւ դուրս գալ փողոցներ, պայքարել բնապահպանական արդարության համար․ ով չի կարող փողոց դուրս գալ, թող ի պաշտպանություն Ամուլսարի դրոշ կախի։
- Ի պաշտպանություն Ամուլսարի ակցիայի մասնակիցները մասնակիորեն փակել են Երեւանի կենտրոնի երթեւեկությունը
- Ամուլսարի պաշտպանության ցույցի մասնակիցները Փաշինյանին մեղադրել են իշխանությունը չարաշահելու մեջ
- Ամուլսարի պաշտպանության երթի մասնակիցները մոտեցան ՀՀ կառավարության շենքին
- Ամուլսարի պաշտպանները կառավարության շենքի դիմաց կարգախոսներ են հնչեցնում եւ թմբկահարում