Հայաստանի նախագահ Արմեն Սարգսյանը շնորհավորական ուղերձներ է ստանում Հայաստանի Անկախության տոնի առթիվ: Այս մասին NEWS.am-ը տեղեկանում է ՀՀ նախագահի աշխատակազմի հասարակայնության հետ կապերի վարչությունից:
Հայաստանի նախագահին իր շնորհավորանքներն ու բարեմաղթանքներն է հղել Ճապոնիայի կայսր Նարուհիտոն։
Բելգիայի թագավոր Ֆիլիպն Անկախության տոնի առթիվ Հանրապետության նախագահին և հայ ժողովրդին մաղթել է բարօրություն և բարգավաճում:
Եգիպտոսի Արաբական Հանրապետության նախագահ Աբդել Ֆաթթահ Ալ Սիսին շնորհավորել է նախագահ Արմեն Սարգսյանին և Հայաստանի բարեկամ ժողովրդին տոնի առթիվ: «Եվս մեկ անգամ վերահաստատում եմ իմ պատրաստակամությունը՝ աշխատելու Ձեզ հետ՝ բոլոր ոլորտներում մեր միջև համագործակցության կապերն ամրապնդելու նպատակով՝ հանուն մեր բարեկամ երկրների ընդհանուր շահերի»,- նշվում է Աբդել Ֆաթթահ Ալ Սիսիի շնորհավորական ուղերձում:
Նախագահականից հայտնում են, որ Արմեն Սարգսյանին շնորհավորել է նաեւ Կանադայի գեներալ-նահանգապետ Ջուլի Պայետը։ Նա շնորհավորական ուղերձում նշել է, որ Կանադան հպարտ է այն հանգամանքով, որ մեծ հայկական համայնքի տունն է համարվում: «Նրանք ամեն օր նպաստում են մեր բարգավաճմանը, ամրապնդում են հարաբերությունները մեր երկու երկրների միջև: Կանադան շարունակում է հանձնառու լինել՝ աշխատելու Հայաստանի հետ ընդհանուր առաջնահերթությունների շուրջ, ինչպիսիք են ժողովրդավարական գործընթացները, թափանցիկ տնտեսական կառավարումը»,- ասված է Ջուլի Պայետի շնորհավորական ուղերձում:
Արաբական Միացյալ Էմիրությունների զինված ուժերի գերագույն փոխհրամանատար, Աբու Դաբիի Արքայազն Մուհամմադ Բին Զայեդ Ալ Նահյանը քաջառողջություն է մաղթել Հանրապետության նախագահ Արմեն Սարգսյանին, իսկ Հայաստանի բարեկամ ժողովրդին՝ մշտական առաջընթաց և բարեկեցություն: