Հանրապետության նախագահ Արմեն Սարգսյանն այսօր հանդիպել է IEEE Computer Society-ի նախագահ, Բոլոնիայի համալսարանի պրոֆեսոր Սեսիլյա Մետրայի եւ «Սինոփսիս Արմենիա»-ի նախագահ Երվանդ Զորյանի հետ:
Հանդիպման ընթացքում անդրադարձ է կատարվել Հայաստանում տեղեկատվական եւ բարձր տեխնոլոգիաների ոլորտներում իրականացված եւ իրականացվող ծրագրերին, ինչպես նաեւ ծրագրավորման եւ հաշվարկային համակարգերի արդի խնդիրներին ու մարտահրավերներին:
Նախագահ Արմեն Սարգսյանը նշել է, որ Հայաստանը ՏՏ ոլորտում կարող է անել ավելին՝ հաշվի առնելով առկա ներուժը: Նա պատրաստակամություն է հայտնել իր աջակցությունը ցուցաբերել ոլորտում իրականացվող ծրագրերին ու նորարարական նախաձեռնություններին՝ նշելով, որ ապագան կապված է դրանց հետ:
IEEE Computer Society-ն համակարգչային ինժեներիայի եւ ծրագրավորողների համաշխարհային կազմակերպություն է, որն ունի ավելի քան 81 հազար անդամ ողջ աշխարհում: Ամեն տարի այն կազմակերպում է համաժողովներ, իրականացնում կրթական ծրագրեր, հրատարակում ոլորտին առնչվող տարբեր նյութեր: