Երեւանում ԱՄՆ դեսպանատան մոտ Հայաստանի քրդական համայնքի ներկայացուցիչներն այսօր՝ հոկտեմբերի 15-ին, բողոքի ակցիա են անում՝ ի նշան Սիրիայի հյուսիս–արեւելքում Թուրքիայի կողմից իրականացվող ռազմական գործողությունների դեմ բողոքի։ Ակցիայի մասնակիցները դատապարտում են քրդական բնակավայրերի վրա թուրքական հարձակումները եւ ցանկանում ԱՄՆ իշխանությունների ուշադրությունը հրավիրել Սիրիայում Թուրքիայի «ցեղասպան գործողությունների վրա»։
Հիշեցնենք, որ հոկտեմբերի 9-ին Թուրքիայի նախագահ Էրդողանը հայտարարել էր, որ Սիրիայի հյուսիս-արեւելյան շրջանում «Խաղաղության աղբյուր» անունով ռազմարշավ է սկսում։
Հայտարարությունից հետո թուրքական զինուժի գործողությունները դատապարտեցին բազմաթիվ երկրներ, այդ թվում՝ ԵՄ անդամ բոլոր երկրները՝ հանդես գալով ռազմարշավը դադարեցնելու համատեղ կոչով: Իսկ Ֆրանսիան, Գերմանիան, Ֆինլանդիան եւ Նիդեռլանդները հայտարարել են, որ կասեցնում են Թուրքիային զենքի մատակարարումը։
Ավելի ուշ Թուրքիային համատեղ հակահարված տալու համար քրդական խմբավորումները համաձայնության են եկել սիրիական կառավարության հետ՝ թուրք-սիրիական սահմանին կառավարական զորքեր տեղակայելու շուրջ: