Թուրքիայի նախագահ Ռեջեփ Թայիփ Էրդողանը նվաստացրել է Գերմանիայի ԱԳՆ ղեկավար Խայկո Մաասին՝ նրան մեղադրելով ոչ պրոֆեսիոնալիզմի մեջ, հայտնում է ՌԻԱ Նովոստին՝ հղում կատարելով Bild-ին։
Թուրք առաջնորդը գերմանական արտգործնախարարի հասցեին խիստ քննադատությամբ է հանդես եկել այն բանից հետո, երբ նա բարձրաձայնել է Սիրիայում ռազմական գործողությունից հետո Անկարա սպառազինությունների արտահանումը սահմանափակելու ծրագրերի մասին։
Էրդողանը Մաասին «դիլետանտ» է անվանել։ «Եթե դու որեւէ բան հասկանայիր քաղաքականությունից, դու այդպես չէիր խոսի»,- հայտարարել է նախագահ Էրդողանը։
Բացի այդ, նա քմծիծաղով է արտահայտվել ռազմական արտահանման Գերմանիայի ծրագրերի վերաբերյալ։ «Եւ ահա գալիս է գերմանացի արտգործնախարարը՝ մարդ, որը չափի զգացում չունի, եւ ասում է․ «Մենք Թուրքիային զենք չենք տրամադրի։ Այլեւս վերջ»,- հայտարարել է Էրդողանը։
Նա հավելել է, որ այդ քայլից կպարտվի ոչ թե Թուրքիան, այլ Մաասը եւ Գերմանիան։