Հայաստանի երկրորդ նախագահ Ռոբերտ Քոչարյանի եւ մյուսների գործով դատավոր Աննա Դանիբեկյանը, խորհրդակցական սենյակից վերադառնալով, հրապարակեց այսօր նախկին նախագահի փաստաբանների ներկայացրած ինքնաբացարկի մասին միջնորդության վերաբերյալ որոշումը: Դատավորը միջնորդությունը մերժեց՝ այն չհիմնավորված համարելով:
Ավելի վաղ փաստաբան Հովհաննես Խուդոյանը միջնորդել էր դատավորի ինքնաբացարկի մասին՝ այն հիմնավորմամբ, որ դատավորն առաջնորդվում է երկակի ստանդարտներով եւ սուբյեկտիվ վերաբերմունք է դրսեւորում: Փաստաբանը որպես ապացույց նշել էր այն հանգամանքը, որ դատավորը ուրիշ գործերով նման հանգամանքների պարագայում ղեկավարվել է ՄԻԵԴ պրակտիկայով եւ գրավով ազատել, սակայն Ռոբերտ Քոչարյանի նկատմամբ գրավը համարում է անհնարին:
Նշենք, որ նախկին նախագահի փաստաբանները դատարան էին ներկայացրել մի շարք այլ միջնորդություններ եւս, այդ թվում՝ դատախազ Պետրոս Պետրոսյանի բացարկի մասին՝ նրա կողմից թույլ տրված դատավարական կոպիտ խախումների հիմնավորմամբ:
Դրանից հետո թարգմանչի բացակայության պատճառով դատավորը ընդմիջում հայտարարեց: