Թուրքիայի նախագահ Ռեջեփ Թայիփ Էրդողանը հայտարարել է Լիբիայի հետ համագործակցությամբ Կիպրոսից հարավ-արեւելք հորատում սկսելու պլանների մասին։ Այս մասին նա հայտարարել է թուրքական պետական TRT հեռուստացանցին նախօրեին տված հարցազրույցում։
Ինչպես գրում է Greek Reporter-ը, Միջերկրական ծովի արեւելքում Հունաստանի ինքնիշխան իրավունքները հերքող այդ աննախադեպ հայտարարությունն անելիս Էրդողանը ներկայացրել է տեղանքի մի քանի քարտեզներ՝ բացատրելով, թե ինչպես է Տրիպոլիի հետ իր «համաձայնությունը» «կապել Հունաստանի ձեռքերը»։ Մեծ էկրանին քարտեզի վրա Էրդողանը ցույց է տվել մի շարք կետեր եւ ընդգծել, որ Թուրքիան դրանք համարում է իր մայրցամաքային սահմանները՝ աղաղակող կերպով անտեսելով Կրետե, Կարպատոս, Ռադոս եւ Կաստելորիզո կղզիների հանդեպ Հունաստանի հին եւ միջազգայնորեն ճանաչված ինքնիշխան իրավունքները։ Սա առաջին անգամ է, որ Թուրքիայի նախագահը բացահայտ կերպով եւ հրապարակայնորեն հայտարարում է առավել լայն տարածաշրջանի հանդեպ Անկարայի հավակնությունների մասին։
Էրդողանը հիշեցրել է, որ Թուրքիայի ծովային սահմանները գտնվում են հունական կղզիների կողքին՝ հավելելով, որ Թուրքիան կարող է «հեշտությամբ» իր հորատումներն անցկացնել այդ տարածքում, իսկ Լիբիան իր հորատումները՝ դեպի հարավ։ Այսպիսով, բացարձակապես անտեսելով տարածաշրջանի փաստացի ծովային սահմանները՝ Էրդողանը ցույց է տվել, թե ինչպես է, նրա խոսքերով, Թուքիան այժմ դարձել Լիբիային հարեւան պետություն։
Նա նաեւ հավելել է, որ Թուրքիան ծրագրում է առաջիկա ամիսներին ձեռք բերել երրորդ հորատող նավը։
Իրեն հատուկ վերամբարձ ոճով Էրդողանը հարցազրույցում կրկնել է, որ Լիբիայի հետ իրենց համաձայնագիրը «կապել է Հունաստանի ձեռքերը», եւ Հունաստանը ոչինչ անել չի կարող։
Թուրքիայի նախագահն իր ամբարտավան եւ տարօրինակ հռետորաբանությամբ այնքան հեռուն է գնացել, որ հայտարարել է, թե տարածաշրջանում ոչ մի երկիր ոչինչ չի կարող անել, եթե Թուրքիան դա թույլ չտա։
Նշենք, որ Եվրոպան, ինչպես նաեւ Անկարայի մոտ դաշնակից համարվող Մոսկվան, դատապարտել են թուրք-լիբիական համաձայնագիրը։