Տասնյակ ուսանողներ բողոքի ակցիա են կազմակերպել հնդկական քոլեջի մոտ` հայտարարելով, որ իրենց ստիպել են մերկանալ` ստուգելու համար` արդյոք նրանց մոտ դաշտան կա, թե ոչ, փոխանցում է AFP-ն:
Ուսանողներին հրամայվել էր մերկանալ այն բանից հետո, երբ Սահանանդի անվան աղջիկների քոլեջի այգում օգտագործված հիգիենիկ միջադիր էր գտնվել, ուր աղջիկներին թույլ չեն տալիս հանրակացարան մտնել դաշտանի ժամանակ: «Խոսքեր չկան` նկարագրելու համար այն նվաստացումը, որին մենք ենթարկվեցինք»,- ասաց ուսանողներից մեկը, որը բողոքում էր Բհուջե քոլեջի մոտ` Գուջարատ արեւմտյան նահանգում:
Հնդկաստանում դաշտանի ընթացքում կանանց նկատմամբ սոցիալական տաբուները պահպանվում են: Որոշ գյուղական շրջաններում կանայք ստիպված են առանձին քնել դաշտանի ընթացքում: Նրանց արգելվում է մուտք գործել որոշ տաճարներ: Քոլեջի տնօրինությունը 68 աղջկա կանգնեցրել էր զուգարանում եւ հրամայել մերկանալ: Քոլեջը գտնվում է պահպանողական հինդուիստական Սվամինարայան աղանդի ենթակայության տակ: Աղանդը շքեղ տաճարներ ունի ամբողջ աշխարհում, այդ թվում` Լոնդոնում:
Ըստ քոլեջների կանոնների` ուսանողուհիներին դաշտանի ընթացքում արգելվում է հանրակացարանում մնալ: Նրանք պետք է ապրեն մեկուսացված նկուղային տարածքում եւ հեռու մնան խոհանոցից եւ երկրպագության վայրից: