Անչափ կարեւոր է, որ Հայաստանում աճում է փոքր եւ միջին ձեռներեցների հետաքրքրությունը պետական գնումների համակարգի հանդեպ, ինչպես նաեւ կատարելագործվում է բողոքարկման եւ հաշվետվողականության համակարգը: Այս մասին փետրվարի 21-ին ԱԺ-ում «Պետական գնումների համակարգի խնդիրները եւ դրանց լուծման ուղիները» թեմայով խորհրդարանական լսումների ժամանակ ասաց Ֆինանսավարկային եւ բյուջետային հարցերով խորհրդարանական մշտական հանձնաժողովի փոխնախագահ, իշխող «Իմ քայլը» դաշինքի պատգամավոր Արտակ Մանուկյանը:
Ընդ որում, նրա խոսքով, պակաս կարեւոր չեն ԵՄ երկրներում «կանաչ» գնումները եւ նման կարգի տարբեր համաձայնագրերը: Պատգամավորը նշեց, որ անհրաժեշտ է ստեղծել լավագույն մրցակցային միջավայր եւ օգնել համակարգն ավելի գրավիչ դարձնել: Նա, միաժամանակ, շեշտեց բողոքարկումների համակարգի բարելավման կարեւորությունը: «Անձամբ մոնիթորինգ եմ անցկացրել եւ տեսել, որ միեւնույն մարդը համանման բողոքներ քննելիս հաճախ տարբեր որոշումներ է կայացնում: Հարց է առաջանում՝ ո՞րն է այն բանի խելամիտ հիմքը, որ կարողանանք զսպել որոշ գայթակղություններ»,- պարզաբանեց խորհրդարանականը:
Մանուկյանը նաեւ ընդգծեց հաշվետվողականության եւ թափանցիկության կարեւորությունը՝ հավելելով, որ այս առումով մեծ աշխատանք է կատարվել, եւ ամեն ինչ ավտոմատացնելու գայթակղությունը զգալիորեն մեծացել է:
«Իմ կարծիքով, սակայն, տվյալները մտցնելու որակը դեռեւս խնդրահարույց է»,- նշեց պատգամավորը:
Դրա հետ մեկտեղ նա նշեց, որ ՓՄՁ-ները դեռեւս ընդհանուր առմամբ մեծ հետաքրքրություն չեն դրսեւորում պետգնումների համակարգի հանդեպ, ուստի, խորհրդարանականի կարծիքով, կարեւոր են այս ուղղությամբ ձեռնարկվող քայլերը: