Փետրվարի 27-ի դրությամբ 2020 թվականին ճանապարհատրանսպորտային պատահարների թիվը մեծացել է անցած տարվա նույն ժամանակահատվածի հետ համեմատ, սակայն Երեւանում նվազեցում է գրանցվել: Այս մասին այսօր Ազգային ժողովում «Բարգավաճ Հայաստան» խմբակցության նախաձեռնած «Ճանապարհային երթեւեկության արդի հիմնախնդիրները եւ դրանց լուծման ուղիները» թեմայով խորհրդարանական լսումների ժամանակ ասաց ՃՈ պետ, ոստիկանության գնդապետ Եգոր Կարապետյանը:
Նա, մասնավորապես, նշեց, որ 2019 թվականի հետ համեմատ Հայաստանում ճանապարհատրանսպորտային պատահարների թիվը 34-ով շատացել է: «Ընդ որում, մահվան դեպքերի թիվը 3-ով քիչ է, վիրավորների թիվը՝ 59-ով շատ»,- ասաց Կարապետյանը:
Միեւնույն ժամանակ, նա նշեց, որ Երեւանում նույն ժամանակահատվածի հետ համեմատ 37-ով քչացել են ճանապարհատրանսպորտային պատահարները, 2-ով՝ մահվան դեպքերը, իսկ վիրավորների թիվը 68-ով քիչ է եղել: «Տարվա երկրորդ ամիսը դեռ չի ավարտվել, սակայն Երեւանում դրական միտում է նկատվել»,- ասաց Կարապետյանը՝ նկատելով, որ տեսանկարհանող սարքեր կան միայն Երեւանում: