Մենք բազմիցս ասել ենք, որ տուրիզմը կարեւոր ոլորտ է, որը համակարգային լուծումներ եւ մոտեցումներ է պահանջում: Նման որոշումներից մեկը կարող է լինել տուրիստական ընկերությունների լիցենզավորումը, ինչը թույլ կտա ավելի արդյունավետ վերահսկողություն իրականացնել եւ ավելի ճշգրիտ վիճակագրություն վարել, ինչը կարեւոր նշանակություն ունի արդյունավետ որոշումներ կայացնելու տեսանկյունից: Այս մասին NEWS.am-ի թղթակցի հետ զրույցում ասաց ՀՀ տուրիզմի ֆեդերացիայի նախագահ Մեխակ Ապրեսյանը:
Ըստ նրա` կառավարության ծրագրի շրջանակներում սոցիալական խմբերի համար, ինչպես նաեւ զբոսաշրջության ոլորտի աշխատակիցների համար շատ կարեւոր է գիդերի աջակցությունը:
Նա պարզաբանեց, որ Ֆեդերացիան պաշտոնապես դիմել է իշխանություններին մի շարք առաջարկություններով: «Հաշվի առնելով ոլորտի առանձնահատկությունները` մենք առաջարկել ենք տուրիստական ընկերություններին հնարավորության սահմաններում առանց տոկոսի վարկեր տրամադրել մինչեւ 36 ամիս ժամկետով` միջոցների ստացումից 12 ամիս անց վարկի մարումը սկսելու հնարավորությամբ: Բացի այդ, մենք առաջարկում ենք սուբսիդավորել աշխատավարձի առաջին 2-3 ամիսները»,- նշել է Մեխակ Ապրեսյանը:
Փորձագետը համոզմունք հայտնեց, որ եթե առանց տոկոսադրույքի վարկերը տրվեն բանկերի միջոցով, դա հնարավորություն կտա միասնական եւ հավասար պայմաններ ստեղծել բոլոր ընկերությունների համար:
«Կարեւոր է նաեւ իրական վարկային արձակուրդների տրամադրումը, այլ ոչ թե այն, ինչ այժմ տեղի է ունենում Հայաստանում: Այն, ինչ մենք հիմա տեսնում ենք, ոչ մի կապ չունի այդ հասկացության հետ»,- եզրափակեց նա: