Գործատուն իր աշխատակիցներին պարտավոր է ապահովել ձեռնոցներով եւ դիմակներով: Այս մասին NEWS.am-ին հայտնեցին ՍԱՏՄ-ի լրատվության ծառայության ղեկավար Անուշ Հարությունյանը:
«Մենք ուղերձներ, ցուցումներ բոլորին ուղարկել ենք` ուղեցույցների տեսքով: Ուղարկել ենք եւ հանրային սննդի կետերին, եւ իրացման ցանցին, եւ արտադրություններին: Մեր հնարավորությունների շրջանակում հետեւում ենք, որ աշխատակիցները ձեռնոցներով եւ դիմակներով ապահովված լինեն: Գործատուն իր աշխատակիցներին պարտավոր է ապահովել ձեռնոցներով եւ դիմակներով»,- ասաց Անուշ Հարությունյանը:
Նա հայտնեց, որ եղել են խանութներ, որտեղ աշխատակիցները չեն կրել դիմակներ. դրանք եղել են հիմնականում փոքր չափերի խանութները. «Եղել են մի քանի դեպքեր, դրանք փոքր խանութներներն են հիմնականում, որ դիմակներ չեն կրել: Նրանք զգուշացվել են եւ հաջորդ ստուգման ժամանակ եղել են դիմակներով եւ ձեռնոցներով»,- ասաց Հարությունյանը եւ հավելեց, որ դիմակներ չկրելու դեպքում տուգանքներ սահմանված չեն: