Իտալիայի նախագահ Սերջո Մատարելան հայտարարել է նոր եվրոպական մոտեցումների անհրաժեշտության մասին COVID-19 կորոնավիրուսի համավարակի դեմ պայքարում եւ հույս հայտնել, որ դրա վտանգը Եվրոպայի համար կգնահատվի ճիշտ ժամանակին, երբ դեռ ուշ չի լինի, հաղորդում է ՌԻԱ Նովոստի-ն:
«Մենք ապրում ենք մեր պատմության տխուր էջը: Մենք տեսել ենք իրադարձություններ, որոնք անհնար կլինի մոռանալ: Մի շարք շրջաններ, եւ, մասնավորապես, ավագ սերունդը շատ թանկ է վճարում»,-հայտարարել է նա:
«Անհրաժեշտ են հետագա համընդհանուր նախաձեռնություններ: Դրանք կփոխարինեն հին սխեմաները, որոնք այլեւս չեն արձագանքում ներկայիս ողբերգական իրականությանը: Ես հույս ունեմ, որ բոլորը գիտակցում են վտանգի լրջությունը Եվրոպայի համար, քանի դեռ չափազանց ուշ չէ: Համերաշխությունը պահանջված է ոչ միայն ԵՄ արժեքների համար, այլ նաեւ բխում է մեր ընդհանուր շահերից»,-ասել է Մատարելան:
Նա ընդգծել է, որ Իտալիայում մի քանի օրվա ընթացքում դիտարկվում են նոր վարակվածների աճի տեմպերի դանդաղում:
Իտալիան զբաղեցնում է առաջին տեղը Եվրոպայում կորոնավիրուսի տարածման արագությամբ: Ըստ ուրբաթ հրապարակված վերջին պաշտոնական տվյալների՝ ներկայում Ապենիններում գրանցված է նոր տիպի վիրուսով վարակման 86 հազար դեպք, շուրջ 11 հազար հիվանդ առողջացել է, զոհերի թիվը կազմում է 9134 մարդ: Այդկերպ Իտալիայում վարակվածների թիվը գերազանցել է Չինաստանում վարակվածների թվին, որի իշխանությունները հայտնել են 81,3 դեպքերի մասին: