Տրամաբանությունը համաճարակի դեմ պայքարն է: Այս մասին այսօր՝ մարտի 28-ին, լրագրողների հետ հանդիպման ժամանակ նշեց ՀՀ փոխոստիկանապետ Հայկ Մհրյանը՝ անդրադառնալով հարցին, թե որն է տրամաբանությունը, որ մարդատար մեքենաներում թույլ չի տրվում երկու հոգուց ավելի գտնվել, իսկ երթուղայիններում ուղեւորները մի քանի անգամ ավելի շատ են եւ ավելի մոտ են նստած իրար, եւ արդյոք դա ավելի չի մեծացնում վարակվելու վտանգը:

«Իհարկե մեծացնում է վարակի տարածման հավանականությունը, դրա համար էլ ես ձեզ զեկուցեցի, որ 48 վարչական ակտ ենք կազմել՝ կապված հանրային տրանսպորտում ավել ուղեւորներ տեղափոխելու հետ»:

Իսկ դիտարկմանը, որ ըստ էության, այդ կարգի համաձայն ամուսինները չեն կարող միասին տաքսի նստել, պետք է առանձին-առանձին տեղաշարժվեն, Մհրյանն արձագանքեց. «Ես կխնդրեմ բոլոր ամուսիններին այս իրավիճակում, հնարավորության դեպքում մեկ-մեկ շրջեն իրենց եւ իրենց բալիկների անվտանգությունն ապահովելու համար»:

Ոստիկանության հասարակայնության հետ կապկերի վարչության պետ Աշոտ Ահարոնյանն էլ հավելեց. «Ոստիկանությունը կիրառում է այն կանոնները, որոնք կան, այս դեպքում մենք չենք մեկնաբանում տրամաբանությունը: Կա կարգ, կա օրենք, ոստիկանությունը պարտավոր է դա ի կատար ածել»: