Ես նախկինում էլ առիթ ունեցել եմ ասելու, որ նպատակ ունեմ մնալու մեր Արցախում եւ իմ հնարավորությունների շրջանում օգտակար լինել մեր ժողովրդին ու հայրենիքին: Այս մասին, այսօր՝ մարտի 31-ին, քվեարկությունից հետո լրագրողների հետ զրույցում նշեց Արցախի նախագահ Բակո Սահակյանը:
Անդրադառնալով հարցին, թե ինչու ընտրությունները չհետաձգվեցին՝ հաշվի առնելով, որ Հայաստանում կորոնավիրուսի համաճարակ կա եւ բոլորին կոչ են անում տանը մնալ, Բակո Սահակյանն ասաց. «Բացառվում է, որ մենք դիմենք այնպիսի որոշումների, գործողությունների, որի հետեւանքով կվտանգվի Արցախի քաղաքացիների առողջությունն ու անվտանգությունը: Մենք անցկացրել ենք բազմաթիվ քննարկումներ եւ եկել ենք այն տրամաբանական որոշման, որ ունենք բոլոր նախադրյալները Սահմանադրության պահանջների համապատասխան այս ընտրությունները կազմակերպելու: Ինչպես գիտեք, այս պահի դրությամբ չի գրանցվել կորոնավիրուսի դեպք Արցախում: Մեր միջգերատեսչական հանձնաժողովի շրջանակներում մենք մշտական դիտարկում ենք անցկացնում: Այդ որոշումը եղել է գիտակցված եւ հիմնավորված»: