ԱԺ «Իմ քայլը» խմբակցության նախկին պատգամավոր Էդգար Առաքելյանն իր ֆեյսբուքյան էջում գրել է.
«Լսեցի Ավինյանի ելույթն ԱԺ-ում, որտեղ նա հիմնավորում էր աղմկահարույց օրինագծի կարևորությունը:
Եվ այսպես, ԱԴ պատվարժան պարետն ասում է, որ փոփոխություններն արվում են զուտ այն նպատակով, որպեսզի մեր քաղաքացիները օր, ժամ, րոպե առաջ հեռախոսազանգի միջոցով տեղեկանան վարակակրի հետ իրենց հնարավոր շփումների և դրանից բխող ստուգվելու կամ ինքնամեկուսացվելու անհրաժեշտության մասին:
Հիմա եթե մեր գերխնդիրն իրոք դա է, ինչո՞ւ պարզապես ամեն օր չենք հրապարակում վարակակիրների անուն-ազգանունները և լուսանկարները, որպեսզի նրանց հետ շփում ունեցած, հետևաբար ռիսկի խմբում գտնվող անձինք ոչ թե րոպե, այլ վայրկյան շուտ ԻՆՔՆԱտեղեկանան վտանգի մասին ու դիմեն համապատասխան քայլերի: Արտակարգ դրություն, ուրեմն արտակարգ դրություն, անձնական կյանքի ու տվյալների անձեռնմխելիության խախտում, ուրեմն խախտում, նա վայնե, ինչպես ասում են, ուրեմն նա վայնե:
Եթե միջոցների մեջ խտրություն չենք դնում, ուրեմն ինչու չենք ընտրում ամենաարագն ու արդյունավետը, այլ աջ ձեռքով ձախ ականջն ենք քորում, այն էլ ծոծրակի վրայով:
Հ.Գ. Հարցս հռետորական չի, իրոք փաստարկված պատասխանի եմ սպասում ու ծագեց այն բանից հետո, երբ ելույթը լսելուց հետո հիշեցի, որ առավոտյան կարդացել եմ ֆեյսբուքյան ընկերներիցս մեկի գրառումն իր վարակված լինելու մասին և դա համարել եմ շատ կարևոր տեղեկատվություն իր հետ շփված անձանց համար: Էդ ընկերոջն ու մեզ բոլորիս առողջություն»:
