Alternativ.am-ը գրում է. երեկ պաշտոնից հեռանալու դիմում է ներկայացրել ԲՈԿ նախագահ Սմբատ Գոգյանը: Վերջինս հրաժարականի համար մի քանի պատճառ է ներկայացրել, որոնցում առանցքային է  սկզբունքային անհամաձայնությունը ԿԳՄՍ նախարարության հետ:  Որպես օրինակ Գոգյանը է նշել ՀՊՏՀ նախկին ռեկտոր Ռուբեն Հայրապետյանի եւ ռեկտորի պարտականությունները ներկայում կատարող Դիանա Գալոյանի գիտական աշխատանքներում առկա թերությունները՝ ընդգծելով, որ դեմ է երեւույթին, ոչ թե անձանց:

Արտագրություններով կամ ակնհայտ թերություններով աչքի ընկնող գիտական աշխատանքները տարիներ շարունակ արժանացել են մասնագիտական հանձնաժողովների դրական եզրակացություններին, եւ ԲՈԿ-ն էլ դրանց հեղինակներին գիտական աստիճանի է արժանացրել: Շատ հաճախ նման գործընթացները ուղեկցվել են աղմկահարույց պատմություններով, հայտնվել են հասարակության ուշադրության կենտրոնում, ինչի արդյունքում արժեզրկվել է թե՛ ԲՈԿ-ը, թե՛ գիտության նվիրյալների եւ առհասարակ գիտության հանդեպ հավատը: Նման աղմկահարույց պաշտպանությունների պակաս վերջին շրջանում էլ չենք ունեցել, երբ կառույցը ղեկավարում էր Գոգյանը: Հիշենք ՀՀ ԱԺ «Իմ քայլը» խմբակցության պատգամավոր Անդրանիկ Քոչարյանի որդու՝ Լեւոն Քոչարյանի թեկնածուական ատենախոսությունը:

Վերջինիս ասպիրանտական կրթությունը ավարտվել է 2019թ.-ի հունիսի 16-ին, ատենախոսության պաշտպանությունն էլ տեղի է ունեցել 2020թ.-ի փետրվարի 20-ին: Այսինքն, Քոչարյան կրտսերը խուսափել է պարտադիր զինվորական ծառայությունից. նա չի զորակոչվել բանակ՝ բաց թողնելով երկու զորակոչ: ԱԺ անվտանգության հարցերի մշտական հանձնաժողովի նախագահի որդին գիտական գործունեություն ծավալելու շղարշի ներքո չի կատարել հայրենիքի առաջ ունեցած պարտականությունները...

Այս պատմության մեջ մի հետաքրքիր դրվագ էլ կա՝ Լեւոն Քոչարյանը ՀՊՏՀ-ում է պաշտպանել ատենախոսությունը, երբ բուհի ռեկտորի ԺՊ-ն Դիանա Գալոյանն է, ով, Սմբատ Գոգյանի բնորոշմամբ, «համապատասխան կապերի եւ հովանավորչության միջոցով առ այսօր զբաղեցնում է իր պաշտոնը»: Դիանա Գալոյանը ՀԱԿ անդամ Զոյա Թադեւոսյանի դուստրն է, Անդրանիկ Քոչարյանն էլ, ինչպես հայտնի է մերձլեւոնական շրջապատի քաղաքական գործիչներից է:

Հետաքրքրական է, որ Լեւոն Անդրանիկի Քոչարյանին տնտեսագիտության թեկնածուի (Ը.00.03 թվանիշով) գիտական աստիճան շնորհելու մասին հրամանը ստորագրվել է այսօր՝ մայիսի 15-ին, Գոգյանի՝ հրաժարական ներկայացնելուց ընդամենը մեկ օր հետո: Ճիշտ է, հրամանը ստորագրվել է հենց Գոգյանի կողմից, իսկ մասնագիտական հանձնաժողովն էլ աշխատանքին դրական գնահատական է տվել, սակայն փաստերի համադրումը մեզ առիթ է տալիս ենթադրելու, որ Անդրանիկ Քոչարյանի որդու գիտական աշխատանքի շուրջ ԲՈԿ-ում թեժ քննարկումներ են տեղի ունեցել: Չի բացառվում, որ Գոգյանի վրա ճնշումներ են գործադրվել, որպեսզի վավերացվի Քոչարյանի աշխատանքը, ինչի արդյունքում վերջինս կազատվեր պարտադիր զինվորական ծառայությունից, քանի որ կունենար գիտությունների թեկնածուի աստիճան, ինչը հիմք է հանդիսանում ԶՈւ չզորակոչվելու համար: Իսկ Սմբատ Գոգյանն էլ՝ որպես սկզբունքային անձ, չի կարողացել աչք փակել կատարվածի վրա եւ որոշել է հեռանալ կառույցի ղեկավարի պաշտոնից: