Չորս եվրոպական երկրներ՝ Ավստրիան, Նիդեռլանդները, Դանիան եւ Շվեդիան, շաբաթ օրը կորոնավիրուսի համավարակից տուժած ԵՄ տնտեսության վերականգնման իրենց ծրագիրն են հրապարակել, հայտնում է DW-ն։

Այս նախագիծն այլընտրանք է դարձել ԳԴՀ կանցլեր Անգելա Մերկելի եւ Ֆրանսիայի նախագահ Էմանուել մակրոնի նախկինում ներկայացրած առաջարկությանը։

Իրենց «խնայող քառյակ» անվանող չորս երկրների ծրագիրը նախատեսում է ԵՄ տնտեսության ամրապնդման համար հատուկ հիմնադրամի ստեղծում, որի գործունեության ժամկետը պետք է սահմանափակվի երկու տարով։ Առավել տուժած երկրներին արտակարգ օգնությունը առաջարկվում է տրամադրել մեկանգամյա վարկերի տեսքով եւ սահմանափակել գործունեության ոլորտները, որոնց վրա կարող են ծախսվել այդ գումարները, մասնավորապես՝ գիտական հետազոտություններ եւ ինովացիա, առողջապահության կայունության բարձրացում եւ «կանաչ» տնտեսությանը անցման ապահովում։

Մերկելի եւ Մակրոնի նախաձեռնության համաձայն, Եվրահանձնաժողովը պետք է ֆինանսական շուկայում 500 մլրդ եվրոյի փոխառություններ վերցնի՝ ԵՄ երաշխավորությամբ, եւ սուբսիդիաների տեսքով բաշխի այն առավել տուժած երկրներին ու տնտեսության ոլորտներին։ Ծրագրի իրականացումը հնարավոր է միայն ԵՄ բոլոր 27 երկրների համաձայնության դեպքում։

Ավստրիայի կանցլեր Սեբաստիան Կուրցը նախօրեին կտրուկ քննադատել է Գերմանիայի եւ Ֆրանսիսյի կոնցեպտը՝ այն անվանելով «հետնամուտքով պարտքային միության ստեղծում»։ Ավստրիան, Նիդեռլանդները, Դանիան եւ Շվեդիան դեմ են Եվրամիության բյուջեի եւ ընդյանուր պարտքային պարտավորությունների մեծացմանը, ինչը թույլ կտա, նրանց կարծիքով, ավելի քիչ կազմակերպված եւ ավելի թույլ երկրներին օգուտ ստանալ իրենց առավել ուժեղ գործընկերների հաշվին։