Իրանը Պարսից ծոցի ռազմավարական ջրերում, հատկապես Հորմուզի նեղուցում անվտանգության միջոցառումները կուժեղացնի: Այս մասին հայտարարել է Իրանի պաշտպանության նախարար, բրիգադի գեներալ Ամիր Խաթամին, փոխանցում է Mehr-ը:
Գեներալ Խաթամին հինգշաբթի ելույթ ունենալով Բանդար Աբաս նավահանգստային քաղաքում նոր հարձակողական արագընթաց մոտորանավերի բացման արարողության ժամանակ՝ նշել է, որ «ԻՀՊԿ-ին մատակարարվող նավերի վրա օգտագործված սարքավորումների ավելի քան 80 տոկոսը, ներառյալ հեռահաղորդակցությունը, ռադարները եւ կառավարման ու վերահսկման համակարգերը երկրի մեջ են արտադրվում, եւ դրանց սպառազինության բոլոր համակարգերը տեղայնացվել են պաշտպանության նախարարության հսկողությամբ»:
Նա հավաստիացրել է, որ այս տարի երկրի պաշտպանական հնարավորությունները նաեւ կնշանավորվեն զգալի ցատկով ցամաքում, օդում եւ ջրում, ինչպես նաեւ էլեկտրոնիկայում եւ ավիատիեզերական ոլորտում: