Առանցքային տնտեսական ցուցանիշները կարող են աղավաղվել կորոնավիրուսի համավարակի պատճառով, նախազգուշացնում է ԱՄՀ-ն:

«Ճշգրիտ եւ ժամանակին արված տնտեսական տվյալները շատ կարեւոր են քաղաքական որոշումներ կայացնելու համար, հատկապես՝ ճգնաժամի ժամանակ: Բայց COVID-19-ի համավարակը խաթարել է շատ կարեւոր վիճակագրական տվյալների արտադրությունը»,- նշվում է ԱՄՀ-ի հայտարարության մեջ:

«Առանց հուսալի տվյալների քաղաքական գործիչները չեն կարող գնահատել, թե որքան վնաս է համավարակը հասցնում մարդկանց եւ տնտեսությանը, եւ չեն կարող պատշաճ կերպով հետեւել վերականգնմանը»:

Հայտարարություն արվել է այն ժամանակ, երբ շատ երկրներ տվյաներ են հրապարակում ՀՆԱ-ի մասին ընթացիկ տարվա առաջին երեք ամիսների ընթացքում: ԱՄՆ-ում՝ աշխարհի ամենամեծ տնտեսությունում, Սպիտակ տունը եւ Կոնգրեսն ՀՆԱ-ի տվյալներն օգտագործում են ծախսերը եւ հարկային քաղաքականությունը պլանավորելու համար: Դաշնային պահուստը եւս ՀՆԱ-ի ցուցանիշները հաշվի է առնում դրամավարկային քաղաքականության որոշման ժամանակ:

«Գործարար մարդիկ այս վիճակագրությունն օգտագործում են աշխատատեղերի, ընդլայնման, ներդրումների եւ այլնի վերաբերյալ որոշումներ կայացնելիս»:

ԱՄՀ-ն նշել է, որ համավարակի ժամանակ հուսալի եւ ժամանակին արված տնտեսական վիճակագրություն ձեռք բերելու կարեւորագույն խոչընդոտներից մեկն այն սահմանափակումներն են, որոնք ազգային վիճակագրական գրասենյակների աշխատակիցներին տանն են պահում:

Ըստ ԱՄՀ-ի, սա կարող է հանգեցնել նրան, որ գների եւ արտադրության վերաբերյալ տվյալները, որոնք վճռորոշ են դրամավարկային քաղաքականության եւ հարկային դրդապատճառների վերաբերյալ որոշումների համար, հետաձգվելու կամ գնահատվելու են մասնակի տեղեկատվության հիման վրա:

Ըստ հիմնադրամի՝ շարունակվող համավարակը նաեւ ընդգծում է հաճախակի թարմացվող տվյալների կարեւորությունը, որոնք քաղաքական գործիչներին թույլ են «առավել հիմնավորված որոշումներ» կայացնել: Բազմաթիվ ավանդական պաշտոնական վիճակագրություններ «պարզապես թարմացված չեն՝ այս պահին օգտակար լինելու համար»:

ԱՄՀ-ն հայտարարել է, որ այս խնդիրները հաղթահարելու եղանակներ կան, այդ թվում՝ տեղեկատվության այլընտրանքային աղբյուրների օգտագործման օգնությամբ: