Հունիսի 8-ին ամբողջ մոլորակը նշում է կարեւոր բնապահպանական տոն՝ Օվկիանոսների համաշխարհային օրը (World Oceans Day), գրում է Calend.ru-ն։

Տոնն առաջարկվել է անցկացնել բարձր մակարդակով «Երկիր մոլորակ» հանդիպման ժամանակ, որը տեղի է ունեցել 1992 թվականին Ռիո դե Ժանեյրոյում: Այդ ժամանակից սկսած՝ ամեն տարի հունիսի 8-ը նշում են նրանք, ովքեր Համաշխարհային օվկիանոսի հետ թեկուզ հեռավոր կապ ունեն։

Այսօր բնապահպանները, ձկնաբանները եւ մեծ թվով կենդանաբանական այգիների, ակվարիումների, դելֆինարիումների աշխատակիցներ իրենց ջանքերը կենտրոնացնում են, որպեսզի պաշտպանեն օվկիանոսների բնակիչներին ու կայուն բնապահպանական միջավայրը։

Օվկիանոսները զբաղեցնում են Երկրի մակերեսի երեք քառորդը, պարունակում են ջրային պաշարների 97 տոկոսը, ըստ ծավալի՝ մոլորակի ամբողջ մակերեսի 99 տոկոսը ու կայուն զարգացման գործընթացի անքակտելի մասն են։ Համաշխարհային օվկիանոսի դերակատարումը կլիմայի կարգավորման գործում դժվար է գերագնահատել, քանի որ այն համակարգաստեղծ է՝ չէ՞ որ դրա ջրերը ածխաթթու գազի գլխավոր կլանիչներից են։