Ոստիկանությունը պարտավոր է անձին ազատությունից զրկելիս տեղեկացնել, թե ինչի համար է նրան զրկում, ինչ ռեժիմով է զրկում. նա բերման ենթարկվա՞ծ է, վարչական ձերբակալմա՞ն է ենթարկվել, ձերբակալվել է քրեական դատավարությա՞ն իմաստով, սակայն «Քաղաքացիական գիտակցություն» ՀԿ ղեկավար Նարեկ Սամսոնյանին բերման ենթարկելիս ոստիկաններն այդ գործողությունները չեն կատարել։ Այս մասին այսօր՝ հուլիսի 8-ին, լրագրողների հետ զրույցում ասաց իրավապաշտպան Ռուբեն Մելիքյանը։
«Այդ գործողությունները չեն կատարվել եւ պարզաբանեցին սկզբից՝ օրինական պահանջը չկատարելու համար, հետո ճշգրտեցին՝ դիմակ չկրելու համար արձանագրություն էին կազմում եւ ինչ-ինչ պատճառներով ավարտին հասցնել չի ստացվել»,- ասաց Մելիքյանը։
Ռուբեն Մելիքյանը շեշտեց, որ քաղաքացիները պետք է իմանան, եթե նրանց վարչական ձերբակալման են ենթարկում, ապա այդ ձերբակալումը պետք է հնարավորինս արագ տեւի. «Սակայն մեկ 1 ժամ 20 րոպե սպասում ենք, թե երբ են մեզ փաստաթղթերը մոտեցնելու։ Եթե 30 հոգի բերման ենթարկված լինեին, հասկանալի է, թե ինչու պետք է մարդը սպասի 1 ժամից ավելի, այս պարագայում մեզ համար հասկանալի չէր»։
Նշենք, որ Նարեկ Սամսոնյանն այսօր բերման էր ենթարկվել ոստիկանական բաժին՝ դիմակը ոչ պատշաճ կրելու համար։ Նա քիչ առաջ ազատ արձակվեց։