Հարավային Կորեայի իշխանությունները հայտնաբերել են Սեուլի անհայտ կորած քաղաքապետ Պակ Վոն Սունի դին: Այս մասին հինգշաբթի հայտնել է չինական CGTN հեռուստաալիքը՝ վկայակոչելով աղբյուրները:
Իր հերթին, Yonhap գործակալությունը տեղեկացնում է, որ քաղաքապետի որոնումները շարունակվում են: Ավելի վաղ Պակ Վոն Սունի դուստրը ոստիկանությանը հայտնել էր հոր անհետացման մասին:
Ըստ իրավապահների եւ քաղաքապետարանի տվյալների՝ քաղաքապետը լքել էր իր նստավայրը ժամը 10:44-ին: Նա սեւ հագուստով էր եւ սեւ ուսապայուսակով: Դրանից կարճ ժամանակ առաջ Սեուլի վարչակազմը հաղորդագրություն էր տարածել քաղաքապետի մասնակցությամբ բոլոր հանդիպումների չեղարկման մասին։ Սեուլի քաղաքապետի հեռախոսն անջատվել էր։
Ոստիկանությունը ծառայողական շներ եւ անօդաչու սարքեր է գործարկել: YTN հեռուստաալիքի տվյալներով՝ օպերացիային մասնակցում է մինչեւ 200 մարդ, փոխանցում է ՏԱՍՍ-ը։