Ադրբեջանը պետք է փոխհատուցում վճարի ինչպես հայ փախստականներին, այնպես էլ նրանց սերունդներին, որոնք ստիպված են եղել լքել իրենց տները` թողնելով իրենց ունեցվածքը: Այս մասին NEWS.am-ի հետ զրույցում հայտարարեց վերջերս ստեղծված Հայ փախստականների պլատֆորմի նախաձեռնող խմբի համակարգող Արթուր Ղազարյանը` անդրադառնալով Ադրբեջանից հայ փախստականների խնդիրների օրինական լուծմանը:
Ըստ նրա` Բաքվի, Կիրովաբադի, Սումգայիթի, Շումումյանի, Գետաշենի հայ փախստականները չեն էլ երազում վերադառնալ իրենց տները, սակայն այսօրվա Ադրբեջանը չի կարող երաշխավորել նրանց իրավունքները: «Ես ուզում եմ հիշեցնել, որ Սովետական Ադրբեջանում գոյություն ուներ պետականաստեղծ եկու ժողովուրդ` հայերը եւ կովկասյան թաթարները (նաեւ ռուսները – խմբ.), որոնք հետագայում կոչվեցին ադրբեջանցիներ: Ապրում էին նաեւ թաթեր, լեզգիններ, քրդեր, լեռնային հրեաներ եւ թալիշներ: Խորհրդային Ադրբեջանի Սահմանադրության ընդունումից հետո թվարկված ժողովուրդների ներկայացուցիչներին անձնագրերում, բացի հայերից եւ ռուսներից, սկսեցին գրանցելորպես ադրբեջանցիների: Ադրբեջանի ԽՍՀ կազմում երկու ինքնավարություն էր ստեղծվել` Նախիջեւանի Ինքնավար Հանրապետությունը եւ Լեռնային Ղարաբաղի Ինքնավար Մարզը (ԼՂԿ): Ավելին, ԼՂԻՄ-ից դուրս մնացին միայն հայերով բնակեցված ե դրանց սահմանամերձ շրջանները Ղարաբաղի հյուսիսում: Այդպիսով, հայերը Խորհրդային Ադրբեջանի պետականաստեղծ ժողովուրդն են, եւ մենք ապրել ենք վերը նշված բոլոր քաղաքներում եւ շրջաններում»,- հիշեցրեց Ղազարյանը:
Ի պատասխան հարցին, թե ինչու այս ամբողջ տարիների ընթացքում Հայաստանի իշխանությունները լրջորեն չեն բարձրացրել Ադրբեջանից փախստականների իրավունքների հարցը` Ղազարյանը նշեց, որ 1988-ին Սպիտակի ավերիչ երկրաշարժից տուժած Հայաստանը, երբ հարյուր հազարավոր մարդիկ անօթեւան մնացին, կարողացավ ապաստարան տալ վերջիններին: «Ճիշտ է, նրանցից շատերը տարբեր երկրներ մեկնեցին` Ռուսաստան, ԱՄՆ, եվրոպական երկրներ, եւ այժմ ցրված են ամբողջ աշխարհով: Մի քանի տարում փախստականների հարցերը հնարավոր չէ լուծել: Բացի գույքային խնդիրներից, կարեւոր են նաեւ ինտեգրման եւ մշակույթի խնդիրները»,- հավելել է Հայ փախստականների պլատֆորմի նախաձեռնող խմբի համակարգողը:
Պատասխանելով հարցին, թե ինչպես է նա բնութագրում եւ գնահատում Հայաստանի իշխանությունների քաղաքականությունը` Արթուր Ղազարյանը հավաստիացրեց, որ ՀՀ իշխանությունների կողմից պատրաստակամություն է զգացվում լսել փախստականների եւ ներքին տեղահանվածների խնդիրները: «Մի մոռացեք, որ կան նաեւ ներքին տեղահանվածներ Արծվաշենից եւ Հայաստանի սահմանամերձ այլ շրջաններից, որոնց մասին քչերն են խոսում: Մեր նախաձեռնած հայ փախստականների պլատֆորմը հանդիպումներ է նախատեսել մեր երկրի տարբեր իշխանությունների հետ: Այնուհետեւ մենք հանդիպումներ կունենանք Հայաստանում արտասահմանյան երկրների դիվանագիտական գերատեսչությունների հետ: Մենք հանդիպումներ կանցկացնենք պատասխանատու անձանց հետ Լեռնային Ղարաբաղի Հանրապետությունում»,- եզրափակեց նախաձեռնող խմբի համակարգողը: