ՀԱՊԿ նախկին գլխավոր քարտուղար Յուրի Խաչատուրովի փաստաբան Միհրան Պողոսյանը միջնորդություն է ներկայացրել, որպեսզի գործի նյութերը տրամադրվեն նրա համար հասանելի լեզվով: Փաստաբանը թվարկել է այն խախտումները, որոնց հետ բախվել է իր պաշտպանյալը քննության ընթացքում:
Նախեւառաջ, խոսքը Խաչատուրովի կողմից գրավոր հայերենի վատ տիրապետման մասին է եւ նրա, թե ինչպես է քննչական մարմինը կատարել մեղադրյալին իր համար հասկանալի լեզվով մեղադրանքի բովանդակության մասին տեղեկացնելու իր պարտավորությունները` տրամադրելով գործի նյութերի անվճար թարգմանությունը:
Մեղադրյալների իրավունքներն ամրագրված են նաեւ միջազգային կոնվենցիաներով: «Սակայն նախաքննական մարմինը չի կատարել այդ պարտավորությունը»,- շեշտել է փաստաբանը:
Քանի դեռ պարոն Խաչատուրովն իրեն հասանելի լեզվով չի ծանոթացել առաջադրված մեղադրանքին, նա չի կարող արտահայտել իր դիրքորոշումը, նշել է փաստաբանը` հավելելով, որ իր վարքագծով հետաքննությունն արդեն իսկ Խաչատուրովին զրկել է քննարկվող հարցերի վերաբերյալ իր կարծիքը հայտնելու եւ իր դիրքորոշումը ներկայացնելու հնարավորությունից: Այսինքն, խախտվել է Յուրի Խաչատուրովի արդար դատաքննության եւ պաշտպանության իրավունքը, արձանագրել է փաստաբանը:
Մերժման դեպքում (գործի ծավալը շատ մեծ է) փաստաբանը խնդրել է տրամադրել միայն հաճախորդի դեմ առաջադրված մեղադրանքի հիմքերի թարգմանությունը:
Ընդհանուր առմամբ Խաչատուրովին էլեկտրոնային տարբերակով փոխանցվել է 76 հատոր: Սակայն քննչական մարմինը մերժել է թարգմանության տրամադրման պահանջը: Քննչական մարմնից չի եղել նաեւ թարգմանիչ տրամադրելու առաջարկ: Մերժում ստանալով` փաստաբանը բողոքարկել է որոշումը դատախազությունում, որտեղ հայցը եւս անհիմն են համարել: «Մենք չպետք է խնդրենք, ՀՀ-ն է մեղադրանք առաջադրել, պարտավոր է հետեւել օրենքի կատարմանը»,- շեշտեց փաստաբանը` հավելելով, որ միայն մեղադրական եզրակացությունն է ստացվել ռուսերենով: Փաստաբանը նշեց, որ ռուսերենով խափանման միջոց ընտրելու որոշումը չի ներկայացվել:
Ինչպես եւ սպասվում էր, դատախազ Պետրոս Պետրոսյանը չհամաձայնեց միջնորդության հետ` չնայած Յուրի Խաչատուրովի իրավունքների ակնհայտ խախտմանը: Փոխարենը, Պետրոսյանը սկսեց դատողություններ անել տերմինաբանության մասին: Ավելին, ըստ նրա, նախաքննական մարմինը տրամադրել է անհրաժեշտ նյութերի թարգմանությունը, փաստաբան եւ թարգմանիչ է տրամադրել, կատարել է իր բոլոր պարտավորությունները եւ մեղադրյալի իրավունքների ոտնահարման մասին խոսք լինել չի կարոց: Նույն կարծիքին է նաեւ դատախազ Գեւորգ Բաղդասարյանը:
Տուժած կողմի ներկայացուցիչները եւս կարծում են, որ պահպանվել են պահանջվող բոլոր ֆորմալությունները:
Կողմերին լսելուց հետո դատավոր Աննա Դանիբեկյանը մերժեց միջնորդությունը` հայտարարելով, որ քննությունը պարտավոր չէ ամբողջությամբ տրամադրել գործի թարգմանությունը: Ինչ վերաբերում է մեղադրանքի հիմքերի հետ կապված որոշ փաստաթղթեր տրամադրելու պահանջին, քանի որ փաստաբանը չի նշել, թե կոնկրետ ինչ է անհրաժեշտ, ապա դատարանն այս դեպքում եւս չի կարող բավարարել միջնորդությունը: Միակ բանը, որը պարզ է դատարանի համար, այն է, որ Խաչատուրովին չի տրամադրվել խափանման միջոց ընտրելու որոշման թարգմանությունը, եւ պատրաստ է ուղղել տհաճ սխալը: Այսպիսով, հայտը մասնակի կբավարարվի: Փաստաբանը առարկեց` հայտարարելով, որ նա պահանջում է մեղադրանքի հիմքերի վերաբերյալ փաստաթղթերը, եւ դատարանը, իր որոշմամբ, վկայակոչելով թարգմանչին, այնուամենայնիվ, սահմանափակում է գրավոր փաստաթղթերին ծանոթանալու Խաչատուրովի իրավունքները: «Այս ամենը հիմք է տալիս կարծել, որ բոլոր գործողություններն ուղղված են նրան, որպեսզի Յուրի Խաչատուրովը չկարողանա իրացնել իր իրավունքները, իսկ դատարանը սուբյեկտիվ վերաբերմունք է ցուցաբերել, ինչը հիմք է տալիս դատավորի բացարակման համար»,- ասաց փաստաբանը:
Յուրի Խաչատուրովը նշեց, որ դատարանն ինքը պետք է որոշի, թե որ փաստաթղթերը պետք է թարգմանվեն: Ըստ նրա` իրեն պետք է պատրաստվել հանդիպմանը, հիշել, թե ինչ է տեղի ունեցել այս կամ այն օրը 12 տարի առաջ` պաշտպանվել կարողանալու համար: Առանց գրավոր նյութերի դա անհնար է, եւ փաստաբանն այստեղ չի կարող օգնել իրեն: «Դատելով նրանից, թե ինչ որոշումներ եք Դուք, հարգելի դատավոր, կայացնում հորս գերեզման այցելելու վերաբերյալ, Դուք կանխակալ որոշումներ եք կայացնում: Ես չեմ հասկանում, թե ինչու եք Դուք այդքան վատ ինձ վերաբերվում»,- ասաց Յուրի Խաչատուրովը: Ընդ որում, նա հիշեցրեց, որ իրեն անհիմն մեղադրանք է առաջադրվել դավադրություն եւ 15 տարվա ազատազրկում ենթադրող հոդվածով (իսկ նախագահին տեսել եմ փետրվարի 23-ին եւ հետո դատարանում), իսկ հիմա դատարանը նաեւ զրկում է պաշտպանվելու հնարավորությունից:
Փաստաբան Արամ Վարդեւանյանը շեշտեց, որ Հայաստանում կարելի է մատերի վրա հաշվել գնդապետ-գեներալներին: «Յուրի Խաչատուրովն իր կյանքը նվիրել է բանակաշինությանը: Եվ միակ պահանջը նյութերի տրամադրումն էր: Մի՞թե մեր պետությունը չէր կարող այդպիսի «բեռ» վերցնել իր վրա»,- ասաց փաստաբանը, բայց այդ պահին նրան ընդհատեց Սեդա Սաֆարյանի հիստերիկ առարկությունը:
Նիստին կրկին տասնհինգ րոպեանոց ընդմիջում հայտարարվեց: