Բեյրութի պայթյունի պատճառը հայտնի չէ, քանի որ կա արտասահմանյան միջամտության հավանականություն՝ հրթիռների, ռումբերի կամ այլ միջոցների կիրառմամբ: Այս մասին հայտարարել է Լիբանանի նախագահ Միշել Աունը, հաղորդում է Լիբանանի MTV հեռուստաալիքը:
Նա նշել է, որ Ֆրանսիայի նախագահ Էմանուել Մակրոնին խնդրել է տրամադրել պայթյունի արբանյակային լուսանկարները: «Եթե նրանք չունեն այդ լուսանկարները, ապա մենք այլ երկրների կխնդրենք պարզել՝ արդյոք միջադեպը արտաքին միջամտության կամ հրդեհի հետեւանք էր»,-ասել է Աունը:
Նա ընդգծել է, որ հետաքննությունը պետք է արագ անցկացվի:
«Նախարարին պետք չէ առաջինը դատել, քննություն է ընթանում, եւ մենք բոլոր մեղավորներին պատասխանատվության կենթարկենք»,-հավաստիացրել է Լիբանանի նախագահը:
Վերջին տվյալներով՝ պայթյունի հետեւանքով զոհվել է 149 մարդ, մոտ 5000 մարդ վիրավոր է:
Միշել Աունի խոսքով՝ 2,750 տոննա սելիտրա, որն օգտագործվել է պարարտանյութեր եւ պայթուցիկներ պատրաստելու համար, պահվել է նավահանգստում 6 տարի առանց անվտանգության միջոցառումների պահպանման: