Բահրեյնը եւ ԱՄԷ-ն դանակով հարվածեցին Պաղեստինի ժողովրդի թիկունքին` կարգավորելով հարաբերություններն Իսրայելի հետ, սակայն Սպիտակ տանը կայացած արարողությունը մեծ իրադարձություն չէր, քանի որ արաբական երկրների եւ Իսրայելի միջեւ շփումներ արդեն գոյություն ունեին 15-20 տարի, «ՌԻԱ Նովոստի»-ին տված հարցազրույցում հայտարարել է Իրանի ԱԳՆ ղեկավար Մոհամմադ Ջավադ Զարիֆը:
«Այն, ինչ տեղի ունեցավ Սպիտակ տանը, նշանակալի իրադարձություն չէր, դա պարզապես հնարավորություն էր` բացահայտելու այն հարաբերությունները, որոնք գոյություն ունեն արդեն 15-20 տարի Պարսից ծոցի հարավային ափի արաբական երկրների եւ Սիոնիստական ռեժիմի միջեւ: Այդ հարաբերությունները ցույց են տալիս, որ այս երկրների` պաղեստինյան խնդրին եւ պաղեստինցիներին աջակցող կարգախոսներն իրական չեն, իրականում դա դանակով հարված է Պաղեստինի ժողովրդի թիկունքին»,- ասել է Զարիֆը:
«Մենք կարծում ենք, որ այդ հարաբերությունները, անշուշտ, կվնասեն Մերձավոր Արեւելքի անվտանգությանը, եւ դրանք օգնում են Սիոնիստական ռեժիմին` ճնշել պաղեստինցիների հավակնություններն ու իրավունքները: Ուստի մենք դեմ ենք այդ հարաբերություններին եւ կարծում ենք, որ դրանք ձեռք են բերվել տարածաշրջանի եւ դրա ժողովուրդների հաշվին»,- ասել է իրանցի նախարարը:
Ավելի վաղ` Սպիտակ տանը տեղի ունեցած արարողության ժամանակ, առանձին համաձայնագրեր էին ստորագրվել` ԱՄԷ-ի եւ Բահրեյնի հետ Իսրայելի հարաբերությունների կարգավորման վերաբերյալ, եւ ԱՄՆ նախագահ Դոնալդ Թրամփն իր ստորագրությունն էր դրել այս փաստաթղթերի վրա, որի միջնորդ դերի շնորհիվ էլ այդ համաձայնագիրը հնարավոր դարձավ: Դրանից հետո Միացյալ Նահանգները, Իսրայելը, Արաբական Միացյալ Էմիրությունները եւ Բահրեյնը միասին ստորագրեցին, այսպես կոչված, «Աբրահամյան համաձայնագրերը»` համաձայնագրեր, որոնք արաբական երկրների հետ կապեր հաստատելու ճանապարհ են բացում Իսրայելի համար, սակայն այս փաստաթղթի ճշգրիտ բովանդակությունը չի բացահայտվում: Հայտնի է միայն, որ Իսրայելը համաձայնել է ժամանակավորապես հետաձգել Հորդանան գետի արեւմտյան ափի տարածքների վրա ինքնիշխանության տարածման որոշումը:
Մինչ այս պահը միայն Եգիպտոսը եւ Հորդանանը դիվանագիտական հարաբերություններ ունեին հրեական պետության հետ. 1978 եւ 1994 թվականների համաձայնագրերը եւս ձեռք էին բերվել Վաշինգտոնի միջնորդությամբ: