ՌԴ եւ Թուրքիայի ԱԳ նախարարներ Սերգեյ Լավրովը եւ Մեւլյութ Չավուշօղլուն «հանգամանորեն քննարկել են Լեռնային Ղարաբաղի շուրջ լարվածության էսկալացիան»:
ՌԴ ԱԳՆ մամուլի ծառայության հաղորդմամբ՝ նախարարները լուրջ մտահոգություն են հայտնել շարունակվող զինված առճակատման շուրջ, կոչ են արել անհապաղ դադարեցնել ռազմական գործողությունները: «Ընդգծվել է հակամարտությունում ուրիշ տարածաշրջաններից անօրինական զինված խմբավորումների ահաբեկիչներին ներգրավելու անթույլատրելիությունը: Նշվել է խիստ կշռադատված քայլերի անհրաժեշտությունը Բաքվին եւ Երեւանին դիվանագիտական եւ քաղաքական աջակցություն ցուցաբերելու հարցում:
Հաստատվել է Ռուսաստանի եւ Թուրքիայի՝ իրավիճակի կայունացմանն ուղղված համակարգման պատրաստակամությունը Լեռնային Ղարաբաղի հակամարտությունը խաղաղ ճանապարհով կարգավորելու նպատակով:
Ռուսական կողմը ներգրավված է ԵԱՀԿ Միսնկի խմբի համանախագահների ջանքերում՝ ներառյալ հոկտեմբերի 1-ի Ռուսաստանի, ԱՄՆ-ի եւ Ֆրանսիայի նախագահների համատեղ հայտարարությունը»,-նշված է հաղորդագրության մեջ:
Անդրադարձ է արվել երկկողմանի օրակարգի արդի հարցերին: Պայմանավորվածություն է ձեռքբերվել հետագա շփումների համար: