Ադրբեջանական քարոզչամեքենան վերջին օրերին սկսել է ակտիվորեն քարոզչական թեզեր պտտել հայերի նկատմամբ դրական վերաբերմունքի մասով, համատեղ ապրելու հնարավորությունների մասով, Արցախն Ադրբեջանի կազմում տեսնելու մասով եւ այլն, որոնք ուղղակի քմծիծաղ են առաջացնում: Այս մասին այսօր՝ հոկտեմբերի 24-ին, լրագրողների հետ հանդիպման ժամանակ նշեց Արցախի մարդու իրավունքների պաշտպան Արտակ Բեգլարյանը:
«Նախ Արցախի ապագան որոշվում է բացառապես Արցախի բնակչությունը՝ ողջ հայ ժողովրդի աջակցությամբ, քանի որ մենք ենք Արցախի Հանրապետության տերը, մենք ենք մեր ճակատագրի որոշողը: Հետեւաբար, որեւէ խոսք չի կարող լինել Ադրբեջանի կազմում ապրելու հնարավորության մասին, դա պարզապես բացառվում է: Մենք ունենք բացառիկ իրավունքներ մեր հայրենիքում ապրելու: Երկրորդ, տասամյակներ շարունակ Ադրբեջանի իշխանություններն այնպիսի քաղաքականություն են վարել, որ խորացրել են իրենց հասարակության մեջ հայերի հանդեպ ատելության մակարդակը եւ ուղղակի անհնար են դարձրել երկու ժողովուրդների համատեղ գոյակցությունը որեւէ տեսանելի ապագայում:
Դրա վառ ապացույցը այս պատերազմի ընթացքում դրսեւորված ատելության մեծ ալիքն է հայության հանդեպ, այդ թվում նաեւ սոցիալական մեդիայում, երբ իրենք հրապարակում են որեւէ տեսանյութ կամ լուսանկար մեր ռազմագերիների կամ դիակների վերաբերյալ անմարդկային վերաբերմունքի, տեսնում ենք, թե ինչպիսի խրախճանք է տիրում ադրբեջանական հասարակության մեջ: Օր առաջ պետք է այս ատելության քարոզը դադարեցնել, եթե իրենք մտածում են հարեւանություն անելու մասին»,-հայտարարեց Բեգլարյանը:
Նա ընդգծեց, որ սրա մասին պետք է մտածի նաեւ միջազգային հանրությունը, որը պատասխանատվություն է կրում այս ամենի համար, քանի որ ակնհայտ էր, որ այս ատելության քարոզը մեկ օր կարող էր պայթել:
Իր խոսի վերջում Արցախի ՄԻ պաշտպանը տեղեկացրեց, որ շուտով միջազգային համապատասխան կառույցներին կներկայացվի երկրորդ փակ զեկույցը՝ Ադրբեջանի կողմից անմարդկային վերաբերմունքի մասով: