ԱՄՆ նախագահական ընտրություններում իր հաղթանակի մասին հայտարարած Ջո Բայդենը հայտնել է, որ առաջին հարյուր օրը նախագահի պաշտոնում նվիրելու է միգրացիոն բարեփոխումներին եւ կորոնավիրուսի դեմ պայքարին:
«Ես կուղարկեմ Սենատ ներգաղթյալների մասին օրենքը, որը քաղաքացիություն ստանալու ճանապարհ կբացի 11 միլիոն չգրանցված մարդկանց համար»,- ասել է նա NBC-ին տված հարցազրույցում, փոխանցում է «ՌԻԱ Նովոստի»-ն:
Քաղաքական գործիչը հավելել է, որ մտադիր է չեղարկել ԱՄՆ ներկայիս նախագահ Դոնալդ Թրամփի որոշ հրամանագրեր, որոնք, իր կարծիքով, վնաս են հասցրել կլիմային եւ մարդկանց առողջությանը:
Բայդենը նաեւ հայտնել է, որ հետաքննություն չի սկսի Թրամփի նկատմամբ, եւ խոստացել է կենտրոնանալ վստահության վերականգնման վրա ամերիկյան հասարակության մեջ:
Ընդ որում, քաղաքական գործիչը նշել է, որ իր նախագահումը Բարաք Օբամայի «երրորդ ժամկետը» չի լինի, որի ընթացքում նա ութ տարի աշխատել է որպես փոխնախագահ: «Մենք բոլորովին այլ աշխարհի ենք բախվել: Նախագահ Թրամփը փոխել է լանդշաֆտը: Այժմ դա «Ամերիկան է առաջին հերթին», այսինքն` «միայն Ամերիկան»,- հավելել է Բայդենը: