Մենք ողջունում ենք Հուշարձանների եւ տեսարժան վայրերի պահպանման միջազգային խորհրդի, Արխիվների միջազգային խորհրդի, Թանգարանների միջազգային խորհրդի, Գրադարանների ասոցիացիայի միջազգային ֆեդերացիայի եւ հաստատությունների համատեղ հայտարարությունը Լեռնային Ղարաբաղում տիրող իրավիճակի վերաբերյալ: Այս մասին նոյեմբերի 27-ին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
Նրա խոսքով` այս հեղինակավոր ՀԿ-ները` ՅՈՒՆԵՍԿՕ-ի գործընկերները, կոչ են արել բոլոր կողմերին, որոնք ներգրավված են հրադադարի մասին համաձայնագրի իրագործման մեջ, ակտիվ ռեժիմով հարգալից վերաբերմունք եւ պաշտպանություն ապահովել մշակութային, պատմական, ճարտարապետական եւ կրոնական ժառանգության բոլոր օբյեկտների նկատմամբ, այդ թվում` զինված բախումների դեպքում մշակութային արժեքների պաշտպանության մասին 1954 թվականի Հաագայի կոնվենցիայի դրույթների համաձայն:
«Մենք ակնկալում ենք, որ այդ կազմակերպությունների փորձագիտական ներուժը, իսկ դրանք ճանաչված են ամբողջ աշխարհում, ամբողջությամբ կգործարկվի ՅՈՒՆԵՍԿՕ-ի առաքելության նախապատրաստման եւ տարածաշրջան գործուղման գործընթացում` հայկական եւ ադրբեջանական կողմերի հետ համագործակցությամբ»,- նշել է Զախարովան: