Թեհրանը ճիշտ ժամանակին վրեժխնդիր կլինի իրանցի միջուկային ֆիզիկոս Մոհսեն Ֆախրիզադեի սպանության համար: Այս մասին հայտարարել է Իրանի նախագահ Հասան Ռոհանին՝ Թուրքիայի նախագահ Թայիփ Էրդողանի հետ հեռախոսազրույցների ժամանակ, փոխանցում է ՏԱՍՍ-ը:
«Իրանի կառավարության իրավունքն է համապատասխան ժամանակ վրեժ լուծել սպանվածի արյան համար»,- իրանցի քաղաքական գործչի խոսքերն է մեջբերում Tasnim-ը:
Ռոհանին նաեւ նշել է, որ եթե հակառակ կողմը (խոսքը ԱՄՆ-ի եւ ԵՄ-ի մասին է) կատարի միջուկային համաձայնագրով ստանձնած իր պարտավորությունները, ապա Իրանը կվերադառնա համաձայնագրի իրագործմանը:
Նոյեմբերի 27-ին մահափորձ էր տեղի ունեցել Ֆախրիզադեի դեմ, որը ղեկավարում էր երկրի պաշտպանության նախարարության ենթակայության հետազոտական կենտրոնը՝ Դամովենդ քաղաքի մոտ (Թեհրանի նահանգ): Ավելի ուշ պաշտպանության նախարարությունը հաստատել էր, որ գիտնականը վիրավորվել, այնուհետեւ մահացել է հիվանդանոցում:
Իրանի արտգործնախարար Մոհամադ Ջավադ Զարիֆը հայտարարել է, որ մասնագետի սպանության մեջ նշմարվում է Իսրայելի հետքը: Ըստ Մեջլիսի (խորհրդարանի) ազգային անվտանգության եւ արտաքին քաղաքականության հանձնաժողովի պաշտոնական ներկայացուցիչ Աբոլֆազլ Ամույիի, մահափորձը կազմակերպել են իսրայելական հատուկ ծառայությունները` այլ երկրների հետախուզությունների հնարավոր ներգրավմամբ: