Եվրախորհրդարանը վերջերս երկու բանաձեւ է ընդունել. մեկն անվտանգության, իսկ մյուսը` մարդու իրավունքների մասին: Այս մասին փետրվարի 2-ին Հայաստանի Ազգային ժողովում մամուլի ասուլիսի ժամանակ ասաց ԵԽԽՎ-ում հայկական պատվիրակության անդամ, արտաքին հարաբերությունների մշտական խորհրդարանական հանձնաժողովի փոխնախագահ, իշխող «Իմ քայլը» դաշինքի պատգամավոր Հովհաննես Իգիթյանը:
Երկուսում էլ, ըստ պատգամավորի, նշվում է ղարաբաղյան խնդիրը: «Այն նշվել է ինչպես անվտանգության տեսանկյունից, այնպես էլ այն առումով, որ Ադրբեջանն արգելված զենքի տեսակներ է կիրառել, ռազմական ճանապարհով խախտել է ստատուս քվոն, ինչը դատապարտման է արժանի, եւ այդ բանաձեւերի հիմնական կոչն ուղղված էր հենց Ադրբեջանին»,- ասաց Իգիթյանը:
Ընդ որում, ինչպես նշեց խորհրդարանականը, հայ պատգամավորներն ակտիվորեն աշխատում են այն երկրների հետ, որոնց խորհրդարանները հայտարարություններով են հանդես եկել այս հարցի վերաբերյալ: