Հիստերիայի աստիճանը, որը արեւմտյան երկրները սկսել են Ալեքսեյ Նավալնու հետ կապված իրավիճակի պատճառով, թույլատրելիի սահմաններից դուրս է: Այս մասին այսօր հայտարարել է Ռուսաստանի արտգործնախարար Սերգեյ Լավրովը Հորդանանի փոխվարչապետ, ԱԳՆ ղեկավար Այման Հուսեյն Աբդալլահ աս Սաֆադիի հետ բանակցությունների արդյունքներով համատեղ մամուլի ասուլիսում, փոխանցում է ՏԱՍՍ-ը:
«Ինչ վերաբերում է Ռուսաստանում տեղի ունեցող իրադարձություններին, ոչ միայն Նավալնու հետ կապված, Արեւմուտքում [դրանք] յուրահատուկ եւ միակողմանի են լուսաբանում,- ասել է նա: - Հիստերիան, որը լսեցինք Նավալնու գործով դատավարության պատճառով, թույլատրելիի սահմաններից դուրս է»:
ՌԴ ԱԳ նախարարը ուշադրություն է դարձրել այն հանգտամանքին, որ Գերմանիայում, Ֆրանսիայում, ԱՄՆ-ում եւ արեւմտյան այլ երկրներում ուղեմաս դուրս եկած եւ հանրային տրանսպորտի նորմալ գործառնությանը խոչընդոտած ցուցարարներին մեծ տուգանքներ են սպառնում եւ անգամ բանտարկության շատ տարիներ: «Ոստիկանները նրանց շատ ավելի կոպիտ են վերաբերվում, քան մեր իրավապահները ապօրինի ակցիաների մասնակիցներին»,- նշել է Լավրովը:
Դրանից բացի, Լավրովը հայտնել է, որ ԵՄ արտաքին գործերի եւ անվտանգության քաղաքականության բարձրագույն հանձնակատար Ժոզեպ Բորելին տեսանյութեր է ուղարկել այն մասին, թե Արեւմուտքում ոստիկանները ինչպիսի կոշտ միջոցներ են կիրառում չարտոնված ցույցերը ցրելիս:
«Որպեսզի այս բանավեճը, եթե Արեւմուտքը դրանում շահագրգռված է, վարվի փաստերի հիման վրա, մենք տեսաշար ենք պատրաստել, թե ապօրինի ցույցերն ինչպես են ճնշվում Արեւմուտքում, եւ ինչպես է մեր ոստիկանությունը մեզ մոտ արձագանքում անկարգություններին,- այսօր լրագրողներին ասել է նա: - Ես այսօր այդ նյութն ուղարկել եմ Բրյուսել ԵՄ արտաքին քաղաքականության հարցերով բարձրագույն հանձնակատար Ժոզեպ Բորելին»: