«Հայրենիքի փրկության շարժման» հաջորդ հանրահավաքը տեղի կունենա մարտի 1-ին՝ ժամը 16։00-ին։ Այս մասին այսօր՝ փետրվարի 27-ին, Բաղրամյան պողոտայում կազմակերպած հանրահավաքին հայտարարեց «Հայրենիքի փրկության շարժման» վարչապետի թեկնածու Վազգեն Մանուկյանը։

«Վաղը հանգստյան օր է։ Մենք քննարկեցինք շարժման ղեկավարների հետ, որ երեւի վաղը ոչ թե հանրահավաքի օր է, այլ այդ բեմը տրամադրենք մեր մտավորականներին, մշակույթի աշխատողներին, սա վաղը լինի ուրախության հրապարակ։

Երկուշաբթի օրվանից արդեն սկսում ենք նորից գնալ առաջ։ Երկուշաբթի օրը ժամը 16։00-ին կլինի հանրահավաք եւ արդեն ժամանակն է մտածել մեր քայլերի մասին, որովհետեւ այն, ինչ մենք անում էինք՝ բերեց այս վիճակին։ Ես հույս ունեմ, որ մենք երկուշաբթի օրն արդեն կլսենք Ոստիկանության եւ ԱԱԾ-ի հայտարարությունները, որ իրենք նույնպես սատարում են բանակին»,- հայտարարեց Վազգեն Մանուկյանը։

Նշենք՝ քիչ առաջ հայտնի դարձավ, որ Հանրապետության նախագահ Արմեն Սարգսյանը վերադարձրել է ԳՇ պետ Օնիկ Գասպարյանին պաշտոնից ազատելու հրամանագրի նախագիծը։

Հիշեցնենք, որ երկու օր առաջ ընդդիմադիրներն Ազատության հրապարակից երթով շարժվել են դեպի Բաղրամյան պողոտա եւ հայտարարել, որ շուրջօրյա ակցիա են իրականացնում այդտեղ:

Նրանք վրաններ ու վառարաններ են տեղադրել այնտեղ և երկու օր է, որ գիշերում են պողոտայում:

Նշենք, որ ընդդիմադիրները Բաղրամյան պողոտայում երեկ նույնպես հանրահավաք են արել, այնուհետեւ երթով շարժվել դեպի Հանրապետության նախագահի նստավայր։