ԱՄՆ-ն պատրաստ է Իրանի հետ քննարկել ԱՄՆ-ում բանտարկված իրանցիներին՝ հանրապետությունում դատապարտված ամերիկացիների հետ փոխանակելու հարցերը: Այս մասին չորեքշաբթի հերթական ճեպազրույցին հայտարարել է Պետդեպարտամենտի մամուլի ծառայության ղեկավարի տեղակալ Ժալինա Փորթերը, հայտնում է ՏԱՍՍ-ը:
Նրան խնդրել են մեկնաբանել Իրանի արտգործնախարար Մոհամադ Ջավադ Զարիֆի խոսքերը, ով կրկին առաջարկությամբ է հանդես եկել բանտարկյալների փոխանակման մասին: «Մենք միշտ պատրաստ ենք կառուցողական համագործակցության Իրանի հետ: Հրավիրում ենք նրանց միանալ մեզ բանակցային սեղանի շուրջ: Եվ սա ընդամենը մեկն է այն բազմաթիվ հարցերից, որոնք մենք կցանկանայինք քննարկել Իրանի հետ, եւ մենք բաց ենք դրա համար»,- ասել է դիվանագետը:
Ավելի վաղ Զարիֆը հայտարարել էր, որ Թեհրանն այս փուլում հիմքեր չունի բանակցելու Միացյալ Նահանգների հետ: Նրա խոսքով՝ Իրանը ցանկանում է համակարգված գործողություններ տեսնել Վաշինգտոնի կողմից իր միջուկային ծրագրի վերաբերյալ Գործողությունների համատեղ համապարփակ ծրագրի (ԳՀՀԾ) կատարմանը վերադառնալու մասով:
2020 թվականի դեկտեմբերի 14-ին Իրանի միջազգային դատական փոխնախարար Ալի Բաղերին հայտարարել էր, որ ԱՄՆ իշխանությունները շուրջ 15 քաղաքացու են իրենց մոտ պահում, ում մեղադրում են ԱՄՆ պատժամիջոցները շրջանցելու փորձի մեջ: