Նոր իրողությունների համատեքստում կարեւոր է առաջիկայում ընդլայնել Ռուսաստանի ռազմական եւ քաղաքական ներկայությունը Հայաստանում: Այս մասին մարտի 19 «Հայ-ռուսական ռազմավարական միության արդի հիմնախնդիրները ժամանակակից սպառնալիքների եւ մարտահրավերների առջեւ» թեմայով քննարկման ժամանակ հայտարարեց «Ինտեգրացիա եւ զարգացում» ՀԿ ղեկավար, Եվրասիական փորձագիտական ​​ակումբի համակարգող Արամ Սաֆարյանը:

Ըստ նրա՝ նման անհրաժեշտություն կա հայ հասարակության մեջ, հատկապես հաշվի առնելով Ռուսաստանի դերի գիտակցումը 2020 թվականի պատերազմի դադարեցման հարցում:

«Հայ-ռուսական հարաբերությունների ամրապնդումն անհրաժեշտություն է, հատկապես՝ տարածաշրջանում Թուրքիայի եւ Ադրբեջանի ակտիվացման, ինչպես նաեւ Արեւմուտքի եւ Ռուսաստանի միջեւ հարաբերությունների խստացման ֆոնին: Դա նոր մարտահրավերներին արդյունավետ կերպով դիմակայելու միակ միջոցն է: Հայաստանում նախընտրական շրջանում կարեւոր է այնպիսի մթնոլորտ ստեղծել հասարակության մեջ, որտեղ կա հայ-ռուսական հարաբերությունների զարգացման անհրաժեշտության ընկալում»,- ընդգծեց փորձագետը: