Երեւանում այսօր՝ ապրիլի 26-ին, ընթանում է «Անկախություն եւ ինքնիշխանություն: Սպառնալիքներ եւ մարտահրավերներ ժամանակակից Հայաստանի համար» թեմայով խորհրդաժողովը:
Խորհրդաժողովին մասնակցում են Հայ-ռուսական համալսարանի ռեկտոր Արմեն Դարբինյանը, ՀՀ-ում ՌԴ գործերի ժամանակավոր հավատարմատար Ալեքսեյ Սինեգուբովը, ՀՀ-ում Ղազախստանի դեսպան Բոլատ Իմանբաեւը, ՀՀ-ում Բելառուսի դեսպան Ալեքսանդր Կոնյուկը, ինչպես նաեւ հրավիրված զեկուցող, պատմական գիտությունների դոկտոր Ալեքսանդր Կրիլովը:
Զեկուցողների թվում կլինեն նաեւ Գագիկ Հարությունյանը, Հայկ Բաբուխանյանը, Պարգեւ Ավետիսյանը, Հովհաննես Սարգսյանը:
Իր ելույթում Սինեգուբովը նշեց, որ Ռուսաստանի արեւմտյան գործընկերներն իրենց բարոյական առաջնորդությունն են թելադրում, փորձում փոխել միջազգային իրավունքը սեփական հնարված աշխարհակարգով: «Նրանք միջամտում են այլ երկրներում հասարակական գործընթացներին, այնտեղ տարածում իրենց մենթալ եւ բարոյական կարգերը, նպաստում ազգային նույնականացման ու ավանդական արժեքների փլուզմանը»,-նշեց Սինեգուբովը: