Տաջիկստանի հետ հակամարտությունում զոհված Ղրղըզստանի քաղաքացիների ընտանիքներին գրեթե 12 հազար դոլարի չափով փոխհատուցում կվճարվի: Այս մասին հայտնել է երկրի նախագահ Սադիր Ժապարովը սահմանամերձ Մաքսատ գյուղի բնակիչների հետ հանդիպման ժամանակ:
«Առաջիկայում Բատկենի շրջանին հատուկ կարգավիճակ կտրվի, զոհվածների ընտանիքներին 1 միլիոն սոմերի (11.9 հազար դոլար) փոխհատուցում կվճարվի, օգնություն կտրամադրվի նաեւ տուժած ձեռներեցներին»,- մամուլի ծառայությունը մեջբերում է պետության ղեկավարի խոսքերը:
Հաղորդվում է, Ժապարովը տեղի բնակիչների հետ հանդիպել է ավերված դպրոցի տարածքում, որտեղ աղոթք է կարդացել բախումներում զոհերի համար:
«Նախագահը նշել է, որ այսօրվանից Մաքսատ գյուղում եւ մյուս տուժած գյուղերում շինարարական եւ վերականգնման աշխատանքներ կսկսեն, վնասված տների փոխարեն նոր ժամանակակից բնակարաններ կկառուցվեն: Ակնկալվում է, որ շինարարական աշխատանքները կավարտվեն երկու ամսվա ընթացքում: Աշխատանքներ են սկսվելու նաեւ ավերված սոցիալական եւ կոմերիցիոն օբյեկտների վերականգնման ուղղությամբ»,- ընդգծել է մամուլի ծառայությունը: