Ռուսաստանի եւ Թուրքիայի նախագահներ Վլադիմիր Պուտինը եւ Ռեջեփ Էրդողանը հեռախոսազրույցում քննարկել են իրավիճակի սրումը Արեւելյան Երուսաղեմում:

«Լուրջ մտահոգություն է արտահայտվել շարունակվող բախումների, սպանվածների եւ վիրավորների թվի աճի վերաբերյալ: Վլադիմիր Պուտինն ու Ռեջեփ Թայիփ Էրդողանը կողմերին լարվածության դեէսկալացիայի եւ ծագող խնդիրները խաղաղ ճանապարհով լուծելու կոչ են արել:

Միեւնույն ժամանակ նշվել է Ռուսաստանի եւ Թուրքիայի սկզբունքային դիրքորոշումը՝ պաղեստինա-իսրայելական հակամարտության երկու պետությունների սկզբունքով լուծման օգտին` ընդհանուր ճանաչված միջազգային իրավական նորմերի հիման վրա, ինչպես նաեւ նշվել է միջազգային միջնորդների «քառյակի» (Ռուսաստան, ԵՄ, ՄԱԿ, ԱՄՆ) հատուկ դերը բանակցային գործընթացին նպաստելու գործում»,- ասված է Կրեմլի հաղորդագրության մեջ:

Քննարկվել են նաեւ կորոնավիրուսի համավարակի դեմ պայքարում համագործակցության հեռանկարները: Վլադիմիր Պուտինը հաստատել է «Սպուտնիկ V» պատվաստանյութը Թուրքիային մատակարարելու ռուսական կողմի պատրաստակամությունը: Առաջիկա օրերին թուրքական պատվիրակությունը կժամանի Մոսկվա՝ այս հարցի քննարկման համար։