Քանի որ Հայաստանի եւ Ռուսաստանի միջեւ ընթանում են միջպետական որոշակի գործընթացներ, ապա ես համարում եմ, որ նպատակահարմար չի սեւեռվել այդ գործընթացների վրա: Այս մասին, այսօր՝ մայիսի 14-ին, ԱԺ արտահերթ նիստում նշեց ԲՀԿ խմբակցության քարտուղար Արման Աբովյանը՝ անդրադառնալով ԱԺ պատգամավոր Արման Բաբաջանյանի դիտարկմանը, թե ինչու ԲՀԿ-ի կողմից ներկայացված ԱԺ հայտարարության նախագծում ոչ մի խոսք չկա Ռուսաստանի մասին, մինչդեռ Ռուսաստանը Հայաստանի ռազմավարական գործընկերն է եւ ԵԱՀԿ Մինսկի խմբի համանախագահներից միայն Ռուսաստանն է, որ չի արձագանքել Հայաստանի սահմաններին տիրող իրավիճակին:
Արման Աբովյանը հիշեցրեց, որ թե Սյունիքում, թե այն վայրերում, որտեղ գնում է էսկալացիա, կանգնած են ոչ թե ֆրանսիական կամա մերիկյան զորքեր, այլ կանգնած են մեր ռազմավարական, եղբայրական պետության զինվորները, որոնք մեզ հետ հավասար վարում են աշխատանքներ, պայքարում են առկա խնդիրները լուծելու համար:
«Ռուսաստանը հաստատ չի լռում, եւ հաշվի առնելով բոլոր հանգամանքները, կարծում եմ՝ տեղյակ եք, որ բավականին ինտենսիվ գործընթացներ են ընթանում միջպետական մակարդակով: Բացի դրանից, հիշեցնեմ, որ Սյունիքում տեղակայված են մեր ռազմավարական գործընկերոջ զորքերը եւ հավատացնում եմ ձեզ՝ դա այսօր ամենակարեւոր զսպող հանգամանքն է, որը զսպում է ագրեսորին: Ես համոզված եմ, որ մեր ռուս գործընկերները արել ու կանեն ամեն ինչ, ինչը բխում է ՀՀ եւ հայ ժողովրդի շահերից».-ասաց Աբովյանը:
Արման Բաբաջանյանը նկատեց, որ այո, ռուսները Սյունիքում են եւ ադրբեջանցիներին հաջողվել է 3,5 մետր խորանալ Հայաստանի տարածքում. «Էլ ինչ պետք է լինի, որ մենք որոշակի վերաբերմունք հայտնենք այս անպատասխանտվության վերաբերյալ: Կա համոզում, որ առանց ՌԴ թողտվության, Ադրբեջանը չէր կարող դիմել այսպիսի արկածախնդրության: Պետք է գոնե մեկ անգամ անկեղծ լինենք՝ Ռուսաստանն այս ամենի մեջ մասնակցություն ունի, թե ոչ»:
ԲՀԿ խմբակցության քարտուղարն ի պատասխան ասաց. «Ինձ համար զարմանալի է, որ Հայաստանից դուրս, հակահայկական շրջանակների փաստարկները բերվում են որպես հակառուսական բան: Դուք ասում եք՝ ռուսները կանգնած էին 3,5 կմ եկան: Ես էլ ասում եմ՝ եթե ռուսները կանգնած չլինեին, ինչքա՞ն կգային: Այսօր հակառուսական տրամադրություններ գեներացնելը վտանգում է Հայաստանը: Այսօր ՌԴ-ի հանդեպ յուրաքանչյուր նման արտահայտությունները բացառապես աշխատում են թուրքերի ու ադրբեջանցիների օգտին: Մենք ունենք անվտանգության համակարգ, որը կառուցված է մեր ռազմավարական գործընկերոջ հետ համատեղ գործողությունների շրջանակում»: