Ի պատասխան Դանիել Իոաննիսյանի («Իրազեկ քաղաքացիների միավորում» ՀԿ-ի ղեկավար - խմբ.) հայտարարությանը, թե «Հայաստան» դաշինքի ներկայացուցիչները զբաղվում են ընտրողներին կաշառելով, հիշեցնեմ, որ նա ֆիզիկոս է, եւ ավելի լավ կլիներ, եթե իր գործով զբաղվեր: Հունիսի 16-ին լրագրողների հետ հանդիպմանը այս մասին ասել է «Հայաստան» դաշինքի կենտրոնական շտաբի ներկայացուցիչ Արամ Վարդեւանյանը:
Նա պարզաբանել է, որ այս հայտարարության կապակցությամբ իրավական գործընթացներ են սկսվելու: «Խոսքը մի մարդու մասին է, որը ոչ մի կապ չունի իրավագիտության հետ: Ինչպե՞ս է ստացվում, որ նա լռում է իշխանությունների խախտումների մասին», - նշել է Վարդեւանյանը: «Հայաստան» դաշինքի մեկ այլ ներկայացուցիչ՝ Վիկտոր Սողոմոնյանը, պարզաբանել է. «Մեր դաշինքը չի կարող կապ ունենալ ընտրողներին կաշառելու դեպքերի հետ:
Եղել են հրապարակումներ, թե, իբր, «Հայաստան» դաշինքի անունից փորձել են կաշառք առաջարկել: Սակայն դա չի համապատասխանում իրականությանը: Այս կապակցությամբ պատրաստվում ենք դատական քննություն սկսել՝ զրպարտության համար պատասխանատվության ենթարկելու համար»: