«Բարգավաճ Հայաստան» կուսակցությունն այսուհետ ևս անելու է հնարավոր ամեն բան՝ մեր երկրում հետպատերազմյան ճգնաժամը հաղթահարելու համար: Այս մասին քաղաքական թիմի հետ հանդիպման ժամանակ հայտարարել է «Բարգավաճ Հայաստան» կուսակցության ղեկավար Գագիկ Ծառուկյանը։
«2021-ի ԱԺ արտահերթ ընտրություններից հետո ԲՀԿ-ն ներգրավված չի լինելու խորհրդարանում, բայց դա չի նշանակում, որ մենք չպետք է զբաղվենք քաղաքականությամբ։ Գրասենյակները բաց են լինելու, դուք աշխատելու եք ժողովրդի հետ, կարևորը մանդատները չեն»,- ասել է Ծառուկյանը։
Նա ընդգծել է՝ այս արտահերթ խորհրդարանական ընտրությունների հիմքում դրված է եղել ատելության ու վախի մթնոլորտը։
«Դրա մեջ մենք չկանք, չենք էլ կարող լինել։ Մենք ամբողջ քարոզարշավի ընթացքում ներկայացրել ենք մեր երկրի անվտանգությունը, ժողովրդի սոցիալ-տնտեսական վիճակը և արտագաղթի կանխումը։ Ինչ ասել ենք, իրական է․ ասողին լսող է պետք։ Շարունակելու ենք մեր աշխատանքը: Ովքեր մեզ ձայն են տվել, չեն սխալվել, կյանքը սրանով չի ավարտվում»,-ասել է ԲՀԿ ղեկավարը։