Հարստության հարկ մտցնելը կօգներ ֆինանսավորել աշխարհի սոցիալ-տնտեսական վերականգնումը համավարակից հետո։ Այս մասին հինգշաբթի ասել է ՄԱԿ գլխավոր քարտուղար Անտոնիու Գուտերիշը՝ ելույթ ունենալով Եվրախորհրդարանում, տեղեկացնում է ՏԱՍՍ-ը։
«Ներկայում ընդամենը մեկ տարում աշխարհի ամենահարուստ մարդկանց կարողությունն ավելացել է 5 տրլն դոլարով։ Ես կրկնում եմ իմ կոչը կառավարություններին՝ դիտարկել համերաշխության կամ այդ մարդկանց հարստության հարկ մտցնելու հնարավորությունը, ինչպես նաեւ այն մարդկանց հարկելու հնարավորությունը, ովքեր շահ են ստացել համավարակից, որպեսզի ֆինանսավորվի սոցիալ-տնտեսական վերականգնումը»,- ասել է նա։
Գուտերիշը ավելացրել է, որ համավարակի հետեւանքով «հարյուր միլիոնավոր մարդիկ հայտնվել են աղքատության եզրին», իսկ բազմաթիվ երկրներ բախվել են սնանկության սպառնալիքին։ «Երկրի բնակչության կեսի համար անհասանելի են առողջապահության անհրաժեշտ ծառայությունները»,- նշել է նա։