ԱՄՆ-ն պատրաստ էր վերսկսել բանակցությունները Վիեննայում Իրանի միջուկային ծրագրի շուրջ, սակայն Թեհրանը խնդրել է հետաձգել մինչ երկրի նոր նախագահի՝ պաշտոնը ստանձնելն օգոստոս ամսին: Այս մասին հայտնում է Reuters-ը՝ վկայակոչելոբ Պետդեպարտամենտի ներկայացուցչին:
«Մենք պատրաստ էինք շարունակել բանակցությունները, բայց իրանցիներն ավելի շատ ժամանակ են խնդրել՝ նոր նախագահի պաշտոնը ստանձնելու գործընթացի կարգավորման համար»,- ասել է նա:- Երբ Իրանն ավարտի այդ գործընթացը, մենք պատրաստ ենք վերադառնալ Վիեննա՝ բանակցությունները շարունակելու համար», - բացատրել է ԱՄՆ արտաքին գործերի նախարարության աշխատակիցը, հաղորդում է ՏԱՍՍ-ը:
«Մենք հետաքրքրված ենք մնում ԳՀՀԾ-ին (Իրանի միջուկային ծրագրի գործողությունների համատեղ համապարփակ ծրագիր) համապատասխանությանը վերադառնալու ուղիներ փնտրելու հարցում, սակայն այս առաջարկն անվերջ ուժի մեջ չի կարող մնալ»,- հավելել է:
Ավելի վաղ Axios տեղեկատվական պորտալը, վկայակոչելով իր աղբյուրը, հաղորդել էր, որ ԱՄՆ վարչակազմը մտադիր է Թեհրանի հետ պայմանավորվել ԳՀՀԾ-ին վերադառնալու շուրջ Իրանի նոր նախագահի երդմնակալության արարողությանը մնացած ժամանակահատվածում: Աղբյուրը նշում է, որ բանակցությունների ձգձգումը մինչեւ օգոստոսի սկիզբը, երբ Իրանում պետք է իշխանության փոխանցում տեղի ունենա, «լուրջ հարցեր կառաջացնի, թե որքանով է հնարավոր» գործարքը:
Ապրիլից ի վեր Վիեննայում բանակցություններ են վարվում Իրանի եւ միջազգային «հնգյակի» (Ռուսաստան, Մեծ Բրիտանիա, Գերմանիա, Չինաստան և Ֆրանսիա) միջեւ՝ նպատակ ունենալով վերականգնել ԳՀՀԾ-ն իր սկզբնական տեսքով: Երեք աշխատանքային խմբերի փորձագետները մշակում են համաձայնագրի կատարման վերսկսման մասին համաձայնագրի տեքստը. Իրանի դեմ ամերիկյան պատժամիջոցների վերացումը (եւ ԱՄՆ-ի հետագա գործարքին վերադարձը) եւ միջուկային պարտավորությունների կատարումը Թեհրանի կողմից, որից այն զգալիորեն շեղվում է: Գործարքին մասնակցող պետությունների ներկայացուցիչները եւս առանձին խորհրդակցություններ են վարում ԱՄՆ պատվիրակության հետ: Մինչ այժմ Վիեննայում ամերիկյան էմիսարների եւ Իրանի ներկայացուցիչների միջեւ ուղիղ բանակցություններ չեն եղել:
Հունիսի 20-ին իրանական միջուկային գործարքի շուրջ բանակցողներն ընդմիջում են վերցրել աշխատանքում՝ բանակցությունների վերջին փուլին նախապատրաստվելու նպատակով իրենց մայրաքաղաքներում խորհրդակցություններ անցկացնելու համար: Ինչպես նշել է Վիեննայում միջազգային կազմակերպություններում Ռուսաստանի մշտական ներկայացուցիչ Միխայիլ Ուլյանովը, միջուկային գործարքի վերականգնման վերաբերյալ համաձայնությունը հասանելիության սահմաններում է: