Թաիլանդի իշխանությունները մայրաքաղաք Բանգկոկի Դոն Մուանգ միջազգային օդանավակայանը վերածել են COVID-19-ով հիվանդների դաշտային հոսպիտալի, հայտնում է Independent-ը:
Որոշումը կայացվել է կորոնավիրուսով վարակման դեպքերի թվի, ինչպես նաեւ մահացությունների թվի ռեկորդային աճի պատճառով:
Դաշտային հիվանդանոցը կկարողանա տեղավորել 1800 հիվանդ: Աշխատողներն արդեն պատրաստել են անհրաժեշտ քանակությամբ մահճակալներ ստվարաթղթե արկղերից, որոնց վրա ներքնակներ եւ բարձեր են դրված: Երկու շաբաթից հիվանդանոցն ամբողջությամբ պատրաստ կլինի:
Կորոնավիրուսի «դելտա» տարբերակի արագ տարածումը ստիպել է հարեւան Կամբոջային փակել սահմանները Թաիլանդի հետ: Իշխանությունները նաեւ սահմանափակումներ են մտցրել ութ նահանգներում:
Թաիլանդում համավարակի ընթացքում ավելի քան 560 հազար մարդ է վարակվել կորոնավիրուսային վարակով, 4.5 հազար մարդ մահացել է: Հուլիսին երկրի առողջապահության նախարարությունը COVID-19-ով վարակման նոր դեպքերի թվի կտրուկ աճ էր գրանցել: