Սիրիայի նախագահ Բաշար Ասադը հաստատել է արաբական հանրապետության նոր կառավարության կազմը, հայտնում է սիրիական պետական ​​SANA գործակալությունը:

Նախագահի հրամանագրին համապատասխան, Ալի Աբդուլա Այուբը պահպանել է փոխվարչապետի եւ պաշտպանության նախարարի պաշտոնները: Ֆեյսալ Միկդադը կշարունակի ղեկավարել արտաքին գործերի եւ էմիգրանտների գործերի նախարարությունը, իսկ Քենան Յագին՝ ֆինանսների նախարարությունը: Մուհամմեդ Խալեդ Ռահմոնը մնացել է ներքին գործերի նախարարության ղեկավարի պաշտոնում:

29 նախարարներից 25-ը նախկին կառավարության կազմում էին, որը ղեկավարում էր Արնուսը, եւ պահպանել են իրենց պաշտոնները: Փոխվել է տեղեկատվության նախարարության ղեկավարը, այն կգլխավորի Բուտրոս ալ-Խալյաքը, ներքին առեւտրի եւ սպառողների պաշտպանության նախարարությունը կգլխավորի Ամրու Սալեմը, իսկ աշխատանքի եւ սոցիալական հարցերի նախարար է դարձել Մուհամմեդ Սայֆուդինը: Կաբինետում ընդգրկված են նաեւ երկու նոր պետական նախարարներ՝ Դիյալա Բարաքաթը (կին) եւ Աբդալլահ Աբդալլահը, հայտնում է ՏԱՍՍ-ը:

Արնուսի գլխավորությամբ նախորդ կառավարության կազմը պետության ղեկավարի կողմից հաստատվել էր անցած տարվա օգոստոսի 30-ին: Այս կաբինետը մայիսի 26 -ին անցկացրել է Սիրիայի նախագահական ընտրությունները, որոնցում Ասադը ստացել է ընտրողների 95,1%-ի աջակցությունը: Հուլիսի 17-ին Սիրիայի առաջնորդը երդվել է՝ որպես պետության ղեկավար չորրորդ յոթամյա ժամկետի համար: