Սեպտեմբերի 17-ին ԱԺ ֆինանսավարկային եւ բյուջետային հարցերի մշտական հանձնաժողովն արտահերթ նիստում քննարկել է ԿԲ վարչության անդամի ընտրության հարցը։
ՔՊ-ն առաջադրել է Արտակ Մանուկյանի թեկնածությունը:
Մանուկյանի թեկնածությունը ներկայացրեց հանձնաժողովի նախագահ, ՔՊ-ից պատգամավոր Գեւորգ Պապոյանը: Նա հատուկ ուշադրություն դարձրեց թեկնածուի գիտական եւ մասնագիտական գործունեությանը, ինչպես նաեւ վերջինիս աշխատանքային փորձին:
Մանուկյանը շնորհակալություն հայտնեց իշխող մեծամասնությանը ցուցաբերած վստահության եւ առաջադրման համար:
«Ես կօգտագործեմ իմ մասնագիտական բոլոր հմտությունները մեր Կենտրոնական բանկի ռազմավարության մշակման համար», - վստահեցրեց թեկնածուն:
Մանուկյանի թեկնածության քննարկումը բավականին երկար ստացվեց, բայց, այնուամենայնիվ, խորհրդարանական հանձնաժողովը դրական եզրակացություն տվեց նրա թեկնածությանը: